საქართველოს შინაგან საქმეთა მინისტრის თქმით, სოფელ ატოცში „ესკალაციის საფრთხე დღესდღეობით არანაირად არ არსებობს“ და მდგომარეობას სრულად აკონტროლებენ.
ვახტანგ გომელაური ამბობს, რომ საოკუპაციო ხაზთან ხალხს და ჟურნალისტებს მათივე უსაფრთხოებისთვის არ უშვებენ:
"ერთი თვის წინ დააყენეს რკინის ბოძები, დღეს მოვიდნენ და უკვე რკინის ცხაურების, ე.წ. "სეტკის“ გაკვრა დაიწყეს ე.წ. ადმინისტრაციულ ხაზზე. იქ რაღაც განსაკუთრებული არ ხდება, კონტროლს ექვემდებარება“, - ამბობს ის.
გომელაურის თქმითვე, აბსურდია საოკუპაციო რეჟიმის მიერ გავრცელებული ინფორმაცია, თითოს ოკუპირებულ ტერიტორიაზე საქართველოს სპეცდანიშნულების ჯგუფები გადადიოდნენ:
„გუშინ და გუშინწინ იყო განცხადებები, თითქოსდა ჩვენი სპეცდანიშნულების ჯგუფები გადადიოდნენ, ზვერავდნენ - რა თქმა უნდა, ეს აბსურდი იყო, არანაირი ჩვენი სადაზვერვო და სპეცდანიშნულების ჯგუფები გადასვლას არ ცდილობდნენ. ვიცით, რომ მათ პირიქით დაარღვიეს და გადმოვიდნენ ჩვენ მხარეს რამდენიმე ხნის წინ“, - ამბობს შს მინისტრი.
ქარელის რაიონის სოფელ ატოცთან საოკუპაციო რეჟიმის წარმომადგენლებმა დღეს, 19 ოქტომბერს, საოკუპაციო ხაზის გავლების სამუშაოები განაახლეს.
