ირანის რევოლუციურმა გვარდიამ ქვეყნის მასშტაბით გამართული საპროტესტო აქციების 100-მდე ლიდერი დააკავა. ირანის სასამართლოს სპიკერის თქმით პროტესტისას კიდევ უფრო მეტი ადამიანი ამოიცნეს და მათაც მალე დააკავებენ.
ირანის პრეზიდენტმა ჰასან როუჰანიმ "მტრის გეგმაზე" გამარჯვება გამოაცხადა და თქვა, რომ "დივერსიული ელემენტების" უკან აშშ, ისრაელი და საუდის არაბეთი იდგნენ.
ინფორმაცია მას შემდეგ გახდა ცნობილი, რაც აშშ-მა ირანის კომუნიკაციების მინისტრს ქვეყანაში აქციების დროს ინტერნეტზე წვდომის შეზღუდვის გამო სანქციები დაუწესა.
Amnesty International-ის მიხედვით აქციებისას სხვადასხვა ქალაქში 100-ზე მეტი ადამიანი მოკლეს. ირანი ოფიციალურად მხოლოდ 12 ადამიანის გარდაცვალებას ადასტურებს.
შეგახსენებთ, რომ პროტესტი მას შემდეგ დაიწყო, რაც მთავრობამ ერთ ლიტრ საწვავზე ფასის 10,000 რიალიდან 15,000 რიალამდე ($0.13) გაზარა და რაციონები დააწესა.
ახალი წესების მიხედვით, მანქანის ყველა მფლობელს შეუძლია 60 ლიტრი ბენზინი იყიდოს თვეში, ლიტრი 15 000 რიალად (0.13$). ყოველი დაატებითი ლიტრი 30 000 რიალი ჯდება.
მანამდე მძღოლებს შეეძლოთ 250 ლიტრი ბენზინის ყიდვა თვეში, ლიტრი 10 000 რიალად.
მთავრობა ამბობს, რომ ბენზინზე სუბსიდიების მოხსნის შედეგად მიღებული შემოსავლები გამოყენებული იქნება დაბალი შემოსავლის მქონე ოჯახებისთვის.
საპროტესტო აქციები 93 ქალაქში გაიმართა. მომიტინგეებმა დაწვეს 100-მდე ბანკის შენობა. ქალაქ ისპაჰანში დაწვეს პოლიციის შენობა. ქალაქ ისლამშეჰრში კი უზენაესი ლიდერის, აიათოლა ალი ხამენეის ფოტოები დაწვეს შეძახილებით "სიკვდილი დიქტატორს".
ირანის შინაგან საქმეთა მინისტრის თქმით პროტესტის ლიდერების იდენტიფიცირება მოხდა და შესაბამისი ზომები მიიღეს.
ქვეყანაში ინტერნეტზე წვდომა სრულად გაწყვიტეს. Fars-ის მიხედვით საპროტესტო გამოსვლებისას ისპაჰანში დაზიანდა 60-მდე ავტობუსი და მეტროს 5 სადგური. ისპაჰანსა და თეირანში მომიტინგეთა გადაადგილების შეზღუდვის მიზნით მეტრო დაიხურა.
აიათოლა ალი ხამენეიმ ირანში ნავთობის ფასის ზრდის გამო მიმდინარე პროტესტს უცხოელი მტრების საბოტაჟი უწოდა. ის ამბობს, რომ ფასის ზრდა ექსპერტების მოსაზრებებს ეყრდნობა. მან ოფიცალურ პირებს მოუწოდა სხვა პროდუქტებზე ფასის ზრდა არ მოხდეს.
ირანში მასშტაბური საპროტესტო აქციები 2017 წლის ბოლოს ეკონომიკური სტაგნაციის, ცხოვრების პირობების გაუარესების და რეგიონში ირანის პოლიტიკის გასაპროტესტებლადაც გაიმართა. პროტესტი 80 ქალაქს მოედო. ოფიციალური პირების ინფორმაციით მაშინ პროსტესტის განმავლობაში სულ 22 ადამიანი დაიღუპა.
ირანის ეკონომიკაზე გავლენა აშშ-ის მიერ დაწესებულმა სანქციებმა მოახდინა. სანქციები ირანს ხელახლა მას შემდეგ დაუწესა, რაც დონალდ ტრამპმა ქვეყანა 2015 წლის ბირთვული შეთანხმების დარღვევაში დაადანაშაულა და აშშ შეთანხმებიდან გაიყვანა.
