საპარლამენტო უმრავლესობა პარლამენტს ჯანმრთელობის დაცვისა და სოციალურ საკითხთა კომიტეტის თავმჯდომარედ ე.წ ამბოხებული დეპუტატის, დიმიტრი ხუნდაძის კანდიდატურას წარუდგენს. ამის შესახებ ბიუროს სხდომაზე, პარლამენტის თავმჯდომარემ თქვა.
არჩილ თალაკვაძის განცხადებით, კომიტეტის თავმჯდომარედ დიმიტრი ხუნდაძის კანდიდატურის არჩევა პირდაპირი კენჭისყრით მოხდება.
ჯანდაცვის კომიტეტის თავმჯდომარის პოსტი ვაკანტური მას შემდეგ გახდა, რაც აკაკი ზოიძემ თანამდებობა დატოვა.
დიმიტრი ხუნდაძე პროპორციულ სისტემაზე გადასვლის შესახებ კანონპროექტის ერთერთი ღიად აქტიური მოწინააღმდეგე იყო. მან სრულად მაჟორიტარულ სისტემაზე გადასვლის მოთხოვნით საინიციატივო ჯგუფიც დაარეგისტრირა და ხელმოწერების შეგროვება დაიწყო. რამდენიმე დღის წინ გამართულ უმრავლესობის სხდომაზე ფრაქციის თავმჯდომარემ მამუკა მდინარაძემ თქვა, რომ ხუნდაძესა და სხვა "ამბოხებულ მაჟორიტარებთან" შეთანხმებას "პრინციპის დონეზე" მიაღწიეს.
