ახალი წლის ღამეს საზოგადოებრივი ტრანსპორტი, მათ შორის, საბაგირო, მგზავრებს უფასოდ მოემსახურება. განცხადება ამის შესახებ თბილისის მთავრობის სხდომაზე კახა კალაძემ გააკეთა.
მისი ინფორმაციით, 31 დეკემბრის 23:00 საათიდან, 75 მარშრუტზე 160 ერთეული ავტობუსი საშუალოდ 25-30-წუთიანი ინტერვალით იმოძრავებს. ტრანსპორტი ანალოგიურად იმუშავებს შობის ღამესაც.
"გარდა ამისა, 31 დეკემბერის, თბილისის მეტროპოლიტენის, ავტობუსებისა და საბაგირო რიყე-ნარიყალას სამუშაო საათები გახანგრძლივდება და მგზავრებს უფასოდ გადაადგილების შესაძლებლობა ექნებათ. ამ რეჟიმში მეტროპოლიტენი და ავტობუსები იმუშავებენ 31 დეკემბრის 23:00-დან პირველი იანვრის 04:00 საათამდე, ხოლო საბაგირო - 03:00 საათამდე. ვფიქრობ ეს ხელშეწყობა არის ძალიან მნიშვნელოვანი და იგივე მიდგომა და დამოკიდებულება გვექნება შობის ღამესაც", - თქვა კახა კალაძემ.
მერიაში აღნიშნავენ, რომ ახალი წლის ღამეს და შობას უფასო იქნება შემდეგი ავტობუსები:
N1, N2, #3, N4, N6, N7, N8, N10, N11, N12, N13, N14, N15, N18, N19, N20, N22, N23, N25, N27, N28, N30, N31, N34, N36, N37, N39, N40, N41, N42, N43, N44, N45, N47, N48, N49, N52, N53, N55, N56, N58, N59, N60, N62, N63, N66, N68, N70, N71, N73, N74, N75, N76, N77, N78, N79, N80, N82, N84, N87, N88, N90, N91, N95, N99, N101, N103, N104, N106, N108, N109, N110, N112, N121, N122 და N140.
