საგანგებო სიტუაციების სამსახურის ინფორმაციით, იმერეთში, ბაღდათში, სადაც ორ სართულიანი სახლი დაიწვა, კიდევ ერთი ცხედარი იპოვეს. დაღუპული ხანში შესული ქალია.
უწყებაში ამბობენ, რომ წერეთლის ქუჩაზე ხანძარი გავრცელებული იყო, დაახლოებით, 200 კვ/მ ფართობზე.
"ხანძრის ლოკალიზაციის შემდეგ, ღია ცეცხლში შესულმა მეხანძრე-მაშველებმა 5 ადამიანის ცხედარი იპოვეს. მათ შორის იყო 1 ქალი და 4 არასრულწლოვანი. მოგვიანებით, ადგილზე ნაპოვნი იქნა კიდევ ერთი - ხანშიშესული ქალის ცხედარი", - აღნიშნავენ საგანგებო სიტუაციების სამსახურში.
უწყების ინფორმაციითვე, ამ დროისთვის ხანძარი სრულად ლიკვიდირებულია.
ადგილზე მუშაობდა საგანგებო სიტუაციების მართვის სამსახურის 6 სახანძრო-სამაშველო ჯგუფი. ასევე, მობილიზებული იყო ყველა შესაბამისი სამსახური.
მომხდართან დაკავშირებით, შინაგან საქმეთა სამინისტრომ გამოძიება საქართველოს სისხლის სამართლის კოდექსის 187-ე მუხლის მე-4 ნაწილით დაიწყო.
საგანგებო სიტუაციების მართვის სამსახური ღრმა მწუხარებას გამოთქვამს მომხდარის გამო და უსამძიმრებს ოჯახს.