ყოფილი პრემიერმინისტრის, შს ყოფილი მინისტრის ვანო მერაბიშვილის თქმით, ის და მიხეილ სააკაშვილი მეგობრები არიან და თავად "მოგვარდებიან". გადაცემა "ღამის მთავარში" მერაბიშვილმა აღნიშნა, რომ ის ყველა მეგობარს შეხვდება.
"მიშა სააკაშვილი ჩემი მეგობარია, მე მას ვთვლი ჩემს საუკეთესი მეგობრად. მე ყველას, მხოლოდ მიხეილ სააკაშვილის კი არა, ყველას აზრს მოვისმენ, მე ჩემს რჩევას მივცემ და შევეცდები, ჩემი აზრი გავაზიარებინო. ჩვენ მეგობრებად დავრჩებით ყოველთვის" - თქვა მერაბიშვილმა.
კითხვაზე, ეწყინა თუ არა მიხეილ სააკაშვილის განცხადება, რომ ვანო მერაბიშვილის ადგილას დაისვენებდა, შს ყოფილი მინისტრი პასუხობს - "მოდით რა, ჩვენ მეგობრები ვართ და მოვგვარდებით ყველა საკითხში. ჩვენ მეგობრები ვართ და ჩვენს აზრებს თავისუფლად ვუზიარებთ ერთმანეთს".
ეკა კვესიტაძემ ვანო მერაბიშვილს მიხეილ სააკაშვილის იმ განცხადებაზეც ჰკითხა, რომელიც შეცდომებს ეხებოდა. კერძოდ, როგორც ყოფილმა პრეზიდენტმა თქვა, "რომ არა ვანო მერაბიშვილის შეცდომები და გადაცდომები", ბიძინა ივანიშვილი ხელისუფლებაში ვერ მოვიდოდა.
"როცა პასუხისმგებლობაზეა ლაპარაკი, მე ვიძახი, რომ თუ ვინმე პასუხისმგებელია, ერთერთი ყველაზე პირველი ვარ მე, რადგან ყველაზე მაღალი თანამდებობა მე მეკავა. ჩვენ არ უნდა დაგვეშვა ის, რომ საქართველოს მომავალს საფრთხე გასჩენოდა, ჩვენ უნდა ვყოფილიყავით უფრო ჭკვიანები, უფრო ლამაზები, უფრო მაღლები, უფრო ნიჭიერები, უფრო უკომპრომისოები, რათა არ გამოგვევლინა რაღაც სისუსტეები, არ მიგვეცა საშუალება, რომ ხალხს ჩვენი რაღაც საქციელი შეცდომად [ჩაეთვალა]" - თქვა მერაბიშვილმა და აღნიშნა, რომ ამას ფიქრობდა ყოველთვის, მაშინაც, როცა ხელისუფლებაში იყო.
"ბევრ რამეს შევცვლიდი, რა თქმა უნდა, ყველაზე დიდი პრობლემა ის იყო, რომ იმ რეფორმას, რასაც ვაკეთებდით, არ ჰქონდა ანალოგი. ანუ არ არსებობდა გაიდლაინი, მაგალითად, რომ დაგუგლოთ, არ არსებობს სახელმძღვანელი პოლიციის რეფორმის, ჩვენ თვითონ გვიწევდა ყოველდღიურად მუშაობა, ახლის მოფიქრება, ამას სჭირდებოდა ძალიან დიდი ენერგია" - განაცხადა შს ყოფილმა მინისტრმა.
ვანო მერაბიშვილმა სასჯელაღსრულების დაწესებულება 20 თებერვალს, თითქმის შვიდწლიანი პატიმრობის შემდეგ დატოვა.
