ხორავას ქუჩის საქმე

ხორავას ქუჩის საქმე - მიხეილ კალანდიას განაჩენს სასამართლო 25 თებერვალს გამოაცხადებს

რუსთავი2

ხორავას ქუჩაზე დავით სარალიძის ჯგუფურად განზრახ მკვლელობაში ბრალდებულის, მიხეილ კალანდიას საქმეზე განაჩენს სასამართლო 25 თებერვალს გამოაცხადებს. 20 თებერვლის სხდომაზე, კალანდიამ დასკვნითი სიტყვა წარმოთქვა და აღნიშნა, რომ პროკურატურა ცდილობს, "ყველა წითელი ხაზის გადაკვეთით" ციხეში გაუშვას "უდანაშაულო ხალხი". მისი მტკიცებით, არასრულწლოვნების ჩხუბის დროს ფარდულში შევიდა, რადგან ცდილობდა, გიორგი ჯანაშიას დახმარებოდა, "მაგრამ არა დანით და რამე იარაღით, სუფთა ხელით. ყველანაირად ვცდილობდი ჩემს თავზე ამეღო დარტყმა".

"აქ მხოლოდ და მხოლოდ იმის გამო ვარ, რომ პროკურატურამ თავზე იმ პასუხისმგებლობის აღება ვერ შეძლო, რომ ეთქვათ, ხალხო ვერ შევძელით იმის დადგენა, ვინ მოკლა დავით სარალიძე“, - განაცხადა მიხეილ კალანდიამ ინტერპრესნიუსის ცნობით.

ხორავას ქუჩაზე არასრულწლოვანი დავით სარალიძის ჯგუფური მკვლელობის ბრალდებით მიხეილ კალანდია მხოლოდ 2019 წლის ზაფხულში, ზაზა სარალიძის ერთწლიანი პროტესტის შემდეგ დააკავეს. იქამდე, კალანდია მკვლელობის საქმის მთავარი მოწმე იყო. მის დაკავებას ევროპული საქართველოს მიერ შექმნილი საპარლამენტო დროებითი საგამოძიებო კომისია ჯერ კიდევ 2018 წლის 5 სექტემბერს მოითხოვდა. 

ხორავას ქუჩაზე ორი არასრულწლოვნის მკვლელობისთვის კიდევ ორი ადამიანია დაკავებული. 28 იანვრის გადაწყვეტილებით, უზენაესმა სასამართლომ დავით სარალიძის და ლევან დადუნაშვილის მკვლელობაში მსჯავრდებულ გიორგი ჯანაშიასთან მხარეთა შორის მიღწეული საპროცესო შეთანხმება დაამტკიცა. გიორგი ჯანაშიას სასჯელი შეუმცირდა და საბოლოოდ, 8 წლით თავისუფლების აღკვეთა შეეფარდა. ჯანაშია აქედან 4 წელს პენიტენციურ დაწესებულებაში მოიხდის, დანარჩენი 4 წელი კი - პირობითად ჩაეთვლება. ის პენიტენციურ დაწესებულებას 2021 წელს დატოვებს.

რაც შეეხება ლევან დადუნაშვილის მკვლელობაში მსჯავრდებულ გუგა ბარბაქაძეს, უზენაესმა სასამართლომ სააპელაციო სასამართლოს გადაწყვეტილება უცვლელი დატოვა და ის მხოლოდ ლევან დადუნაშვილის მკვლელობაში ცნო დამნაშავედ. ბარბაქაძეს სასჯელიც უცვლელი დარჩა - მას 11 წლითა და 3 თვის ვადით აქვს თავისუფლების აღკვეთა შეფარდებული.

ხორავას ქუჩაზე ორი არასრულწლოვანი 2017 წლის დეკემბერში მოკლეს.

კომენტარები