13 მარტის ოფიციალური მონაცემებით, გერმანიაში ახალი კორონავირუსით დაავადება ერთ დღეში, წინა დღესთან შედარებით, კიდევ 693 ადამიანი დაუდასტურდა.
ამჟამად გერმანიაში ახალი ვირუსით ჯამში 3 062 ადამიანია დაავადებული. გარდაიცვალა 6 პირი.
11 მარტს გერმანიის კანცლერმა ანგელა მერკელმა განაცხადა, რომ სავარაუდოდ, გერმანიის მოსახლეობის 70% ახალი კორონავირუსით დაავადდება.
11 მარტს ჯანდაცვის მსოფლიო ორგანიზაციამ ახალი კორონავირუსი პანდემიად გამოაცხადა. პანდემია დაავადების გეოგრაფიულ გავრცელებაზე მიუთითებს და არა მის სიმძიმეზე. ჯანმო-ში აღნიშნეს, რომ ახალი ვირუსუს წინააღმდეგ, რომელიც თავდაპირველად ჩინეთში გავრცელდა, ბრძოლის ახალი ფრონტის ხაზი ამჟამად იტალია და ირანი იყო.
მსოფლიოში ახალი კორონავირუსით გარდაცვლილია 5 588 ადამიანი. გამოვლინდა კორონავირუსით ინფიცირების 142 320 შემთხვევა, აქედან 70 000-ზე მეტი ადამიანი გამოჯანმრთელდა. ახალი ვირუსი 129 ქვეყანასა და ტერიტორიაზეა გავრცელებული.
ჩინეთის შემდეგ, კორონავირუსით დაავადების ყველაზე მეტი შემთხვევა ამჟამად იტალიაშია დადასტურებული - იტალიაში ბოლო 24 საათში კორონავირუსით კიდევ 250 ადამიანი დაიღუპა, გამოვლინდა ინფიცირების 2 547 ახალი შემთხვევა. ჯამში იტალიაში Covid 19-ით დაინფიცირებულთა რაოდენობამ 17 760-ს მიაღწია, ხოლო გარდაიცვალა - 1266 ადამიანი. კორონავირუსის გამო 10 მარტს მთელი იტალია ჩაკეტეს.
რაც შეეხება საქართველოს, ამჟამინდელი მონაცმებით, ქვეყანაში კორონავირუსის 25 შემთხვევაა დადასტურებული. უკანასკნელი ინფორმაციით, კარანტინის რეჟიმში 314, ხოლო სტაციონარში მეთვალყურეობის ქვეშ - 63 ადამიანი იმყოფება.