შინაგან საქმეთა სამინისტროს ინფორმაციით, საპარტრულო პოლიცია დღეს, 22 მარტს, სამების საკათედრო ტაძარში გამოძახების გამო მივიდა, თუმცა დარღვევა ვერ დააფიქსირა.
"გაესაუბრნენ მეუფეებს, დარღვევა არ დაფიქსირდა და დატოვეს ტერიტორია", - უთხრეს ტაბულას შსს-ში.
საგანგებო მდგომარეობისა და 10 კაცზე მეტის შეკრების შეზღუდვის მიუხედავად, დღეს სამების საკათედრო ტაძარში წირვა მაინც ჩატარდა. ადგილზე საპატრულო პოლიცია მივიდა. გავრცელებული ინფორმაციით, პოლიცია ერთ-ერთმა მოქალაქემ გამოიძახა, რადგან ტაძარში 10 კაცზე მეტი იყო შეკრებილი.
გუშინ საქართველოს პრემიერმინისტრმა, გიორგი გახარიამ, თქვა, რომ შეკრების შეზღუდვა ეკლესიასაც ეხებოდა.
მიუხედავად ამისა, პარლამენტის თავმჯდომარემ, არჩილ თალაკვაძემ საპირისპირო განცხადება გააკეთა: "პრეზიდენტის დეკრეტის თანახმად, რწმენის და აღმსარებლობის თავისუფლება არ არის შეზღუდული. შესაბამისად, ამ მომენტისთვის, რელიგიურ რიტუალში მონაწილეობა და აღმსარებლობა არის ამ უფლების ნაწილი".
20 მარტს შეკრებილმა წმიდა სინოდმა, ეპიდემიას უმოქმედობით უპასუხა - ღვთისმსახურებები არ შეაჩერა, ზიარების წესი არ შეცვალა.