საქართველოს პრემიერმინისტრის, გიორგი გახარიას თქმით, კორონავირუსით ინფიცირებულთა შორის ერთ-ერთი სამედიცინო სექტორის წარმომადგენელია.
"დღეს პირველი შემთხვევაა, როდესაც გვაქვს სამი შემთხვევა, რომლის წარმომავლობასაც ვერ ვადგენთ. როდესაც მსგავსი შემთხვევა იყო მარნეულში, ჩვენ მივიღეთ საგანგებო ღონისძიებები და მარნეული და ბოლნისი გამოცხადდა საკარანტინო ზონად. დღეს ჩვენ გვაქვს სამი ასეთი შემთხვევა და სამწუხაროდ, ამასთან ერთად გვაქვს ერთი შემთვხვევა, როდესაც სამედიცინო სექტორის თანამშრომელი არის ინფიცირებული. ეს გვაძლევს, ყველა იმ სხვა მოცემულობასთან ერთად, შემდგომი ნაბიჯების გამკაცრების შესაძლებლობას", — განაცხადა გახარიამ.
კორონავირუსის გამო, საქართველოში "ფაქტობრივად, საყოველთაო კარანტინი" ცხადდება. ამის შესახებ პრემიერმინისტრმა გიორგი გახარიამ საგანგებო ბრიფინგზე თქვა. მისი თქმით, იკრძალება ყველა სახის საზოგადოებრივი ტრანსპორტი, მათ შორის მეტრო. ასევე, იკრძალება სამ ადამიანზე მეტის თავშეყრა და 70 წელს გადაცილებული ადამიანის სახლიდან გასვლა.
21:00-დან დილის 06:00-მდე ე.წ კომენდატის საათი ცხადდება.
