ახალი კორონავირუსი

გერმანიის მთავარი ვირუსოლოგი: ინფიცირებულთა რიცხვის შემცირების გარეშე Covid 19-ს ვერ მოვერევით

თამთა ნაჭყებია
0 კომენტარი

პროფესორი კრისტიან დროსტენი გერმანიაში ახალი კორონავირუსის ეპიდემიასთან ბრძოლას სათავეში უდგას. გერმანია Covid-19-ის ინფექციას ევროპის ბევრ სხვა ქვეყანაზე წარმატებით უმკლავდება. აქ ახალი კორონავირუსით სიკვდილიანობის მაჩვენებელი სხვების მონაცემებს მნიშვნელოვნად ჩამოუვარდება, მაგალითად, თუ იტალიაში ფატალური შედეგი დადასტურებული შემთხვევების 12.5%-ში დადგა, ესპანეთში კი 9.8%-ში, გერმანიაში გამოვლენილი დაინფიცირებულების 1.75% გარდაიცვალა.

როგორ ებრძვის გერმანია ახალი კორონავირუსს, რა მეთოდებს იყენებს, რა პრინციპით ატარებენ ტესტირებას და რა არის სამომავლოდ დაგეგმილი ნაბიჯები - გამოცემა Zeit Online ქვეყნის მთავარ ვირუსოლოგს ესაუბრა.

ავტორი: ფლორიან შუმანი

ZEIT ONLINE: ცხოვრება, რომელსაც ჩვენ ვიცნობთ, იცვლება. ბატონო დროსტენ, ხომ არ ღელავთ?

კრისტიან დროსტენი: ბევრი სხვა ადამიანის მსგავსად, მეც, გარკვეულწილად არსებული სიტუაციის უარყოფის ფაზაში ვარ. ვიმედოვნებ, ჩემსა და ჩემს ოჯახზე ეს არ აისახება. თუმცა, ეს ძალიან შესაძლებელი იყო. არსებობენ ისეთი ადამიანებიც, რომლებიც ახალ რეალობას სრულიად უგულებელყოფენ.

ZEIT ONLINE: თუმცა, ადამიანები ამ ქვეყანაში (გერმანიაში) გისმენენ, თქვენ მიერ ნათქვამ სიტყვას დიდი წონა აქვს. რა გავლენას ახდენს თქვენზე ეს როლი?

კრისტიან დროსტენი: ზოგჯერ ეს დამოკიდებულება ცოტა გადაჭარბებული ხდება - მისმენენ მედიები, პოლიტიკოსები...მე არ ვარ პოლიტიკოსი, მე მეცნიერი ვარ. ბედნიერი ვარ, როცა ვსაუბრობ იმაზე, ვხსნი იმას, რაც ვიცი. სამეცნიერო მიგნებების შესახებ ცნობები ყველას გამჭვირვალედ უნდა მიეწოდოს, რათა ვითარების შესახებ წარმოდგენა გვქონდეს. მე ასევე გულწრფელად ვამბობ იმას, რაც არ ვიცი. ყოველთვის ასე ვიქცეოდი.

ZEIT ONLINE: ითქვა, რომ თქვენ ითამაშეთ ცენტრალური როლი სკოლების დაკეტვის გადაწყვეტილებაში. ამ გადმოსახედიდან, იყო თუ არა ეს სწორი გადაწყვეტილება?

კრისტიან დროსტენი: არ ვიცი. იყო თუ არა ამის გასაკეთებლად შერჩეული სწორი დრო, მოგვიანებით გაირკვევა. მე ყოველთვის ვამტკიცებდი, რომ სხვა დისციპლინების მეცნიერებსაც უნდა მოუსმინონ და რომ ასეთი გადაწყვეტილება ჩემსავით ეპიდემიოლოგის და ვირუსოლოგის კომპეტენციას სცდება. მე არ ვფიქრობ, რომ ჩემი საქმიანობა ჭეშმარიტებაზე საუბარია - ის უფრო ჭეშმარიტების ასპექტების ახსნას, გაურკვევლობის აღმოჩენას და იმის თქმას გულისხმობს, რომ "ჩვენ არ ვიცით", რაც პოლიტიკური გადაწყვეტილების მიღებას აუცილებელს ხდის. რადგან პოლიტიკური გადაწყვეტილება ამ ყოველივეს გათვალისწინებით იქნა მიღებული, ვფიქრობ, ეს კარგია.

ZEIT ONLINE: გამოიღებს თუ არა შედეგს ეს ზომები?

კრისტიან დროსტენი: ვიმედოვნებთ, ისინი ინფექციის გადაცემის დინამიკას მნიშვნელოვნად შეცვლის. ამის შეფასება დაახლოებით აღდგომისთვის იქნება შესაძლებელი (12 აპრილი). შესაძლოა დავინახოთ, რომ იმაზე გაცილებით ნაკლები ადამიანი დაინფიცირდა, ვიდრე მოველოდით, არსებული სწრაფი ზრდის ფონზე, რომ ციცაბო მრუდი განვითარდა. თუმცა, თავდაპირველად, ამას სიკვდილიანობის მაჩვენებელზე ნაკლები გავლენა ექნება, ვინაიდან იმათი ნაწილი, ვინც აღდგომამდე დაიღუპება, უფრო ადრე დაინფიცირებულები იქნებიან. ბოლო დროს მიღებულ გადაწყვეტილებებს არ ექნებათ მყისიერი ეფექტი. მას გარკვეული დრო დასჭირდება. ზოგიერთი საკითხი ნორმალიზდა, მაგალითად ის, რომ უფრო და უფრო მეტი ადამიანი იგებს, რატომ არ უნდა შეიკრიბონ ჯგუფურად. ადამიანებს დრო დასჭირდებათ ამასთან შესაჩვევად.

ZEIT ONLINE: უფრო მკაცრი ზომები, როგორიც არის გადაუდებელი საჭიროების გარდა, ადამიანებისთვის საცხოვრებელი სახლიდან გამოსვლის აკრძალვა აქტიურად განიხილება, უმეტესად იმიტომ, რომ ყველას ჯერაც ვერ გაუაზრებია, რომ უნდა დარჩნენ სახლებში და შეამცირონ სხვებთან კონტაქტი, რათა საზოგადოება დაიცვან.

კრისტიან დროსტენი: ვფიქრობ, მომდევნო რამდენიმე კვირაში ადამიანები ამას გაიგებენ. ეს ზომები ჯერაც ახალია, თუმცა, ადამიანების უმეტესობა მათ გაითვალისწინებს. ყოველთვის იქნებიან ადამიანები, რომლებიც არაფერს შეცვლიან. რა თქმა უნდა, ასეთი ადამიანები ჩინეთში არ არსებობენ - ისინი ამისთვის ისჯებიან. მაგრამ მე მოხარული ვარ, რომ ჩვენ არ ვცხოვრობთ მსგავს საზოგადოებაში. და არც ვარ დარწმუნებული, რომ მთლიანობაში, საჭიროა თითოეული პირის პოვნა, რომელიც წესებს არ ითვალისწინებს.

ZEIT ONLINE: ანუ, თქვენ არ იტყვით, რომ ამიერიდან არავინ უნდა გავიდეს გარეთ?

კრისტიან დროსტენი: ვინ ვარ, რომ მსგავსი რამე ვთქვა? მე, როგორც ვირუსოლოგმა, შემიძლია ვისაუბრო, როგორ არის საქმეები ჩემს სფეროში. სხვა საკითხები უბრალოდ ჩემი კომპეტენციის სფეროს არ განეკუთვნება. წინააღმდეგ შემთხვევაში უნდა ვისაუბრო არა როგორც მეცნიერმა, არამედ როგორც კერძო პირმა. მე არ მაქვს მანდატი ამომრჩევლებისგან, მაგრამ მჯერა, რომ ბარების და რესტორნების დახურვა, დიდი ღონისძიებების გაუქმება და დღის ცენტრების და სკოლების დახურვა მნიშვნელოვანი მიღწევაა. მიზანია, რაც შეიძლება მეტი ადამიანი იყოს დაცული სხვებთან კონტაქტისგან.

ZEIT ONLINE: როგორია თქვენი შეფასება, როგორ გაართვა თავი გერმანიამ ვირუსის გავრცელების საწყის ეტაპებს?

კრისტიან დროსტენი: მე მჯერა, რომ გერმანიამ ქვეყანაში გავრცელება ადრეულ ეტაპზევე აღიარა. მეზობელ ქვეყნებზე 2-3 კვირით ადრე. ჩვენ შევძელით ამის გაკეთება იმიტომ, რომ ძალიან ბევრი ადამიანის დიაგნოსტირებას ვახდენთ, ბევრ ტესტს ვაკეთებთ. რა თქმა უნდა, პირველ ეტაპზე ინფიცირების ზოგიერთი შემთხვევა გაგვეპარა, მსგავსი რამ ყოველთვის ხდება. მაგრამ არ ვფიქრობ, რომ ფართო გავრცელება შეუმჩნეველი დაგვრჩა. ეს იმითაც დასტურდება, რომ გერმანიაში შემთხვევები იზრდება ისე, როგორც ეს მოსალოდნელი იყო, ვხედავთ იმასაც, რომ გარდაცვალების მაჩვენებელი სხვა ქვეყნებთან შედარებით დაბალია. რა თქმა უნდა, არ გვაქვს იდენტიფიცირებული ყველა შემთხვევა, მაგრამ, ჩვენ ვხედავთ მეტს, ვიდრე სხვა ქვეყნები, რომლებიც ნაკლებ ტესტირებას ატარებენ.

ZEIT ONLINE: მაგალითად, იტალია?

კრისტიან დროსტენი: იტალიაში ახალ კორონავირუსზე ტესტირებას უტარებენ იმ ადამიანებს, რომლებიც საავადმყოფოებს მიმართავენ. ეს იმიტომაც ხდება, რომ ადამიანებმა იციან, რომ იქ მაინც არ არის ტესტების საკმარისი რაოდენობა, ამიტომ რჩებიან სახლებში, იმ შემთხვევაშიც კი, თუ სიმპტომები აქვთ. ისინი საავადმყოფოებს მხოლოდ მდგომარეობის გაუარესების შემთხვევაში მიმართავენ. ინფიცირებულები ჰოსპიტლებში ხვდებიან სუნთქვის გაძნელებით და მომენტალურად საჭიროებენ ინტენსიური თერაპიის განყოფილებაში განთავსებას, სადაც ტესტირება პირველად უტარდებათ. სწორედ ამიტომ არის, რომ დადასტურებული შემთხვევების საშუალო ასაკი იტალიაში გაცილებით მაღალია, ვიდრე გერმანიაში. მე ვვარაუდობ, რომ ბევრი ახალგაზრდა იტალიელი ისეა დაინფიცირებული, თავადაც არაფერი იცის ამის შესახებ. ეს ასევე ხსნის იტალიაში სიკვდილიანობის მაღალ მაჩვენებელს.

ZEIT ONLINE: კიდევ რამდენი ხნის განმავლობაში გაგრძელდება მოქალაქეების ტესტირება გერმანიაში?

კრისტიან დროსტენი: რაღაც მომენტში ეს აღარ იქნება შესაძლებელი. ჩვენ უბრალოდ ვერ შევძლებთ, გავზარდოთ ჩვენი ტესტების რაოდენობა შემთხვევების ზრდასთან ერთად. ამის შემდეგ ორი რამ: პირველი - ის ადამიანები, რომლებიც ახლა არიან ინფიცირებულები COVID 19-ით, დაიღუპებიან. და მეორე - იმის გამო, რომ ვერ შევძლებთ, ყველას ჩავუტაროთ ანალიზი, ჩვენი სტატისტიკა არასრული იქნება. ასეთ დროს ჩვენი სიკვდილიანობის მაჩვენებელიც გაიზრდება. აღმოჩნდება, რომ ვირუსი კიდევ უფრო საშიში გახდა, მაგრამ ეს უბრალოდ დამახინჯებული სტატისტიკა იქნება. ის უბრალოდ ასახავს იმას, რაც უკვე ხდება: ჩვენ სულ უფრო და უფრო მეტ შემთხვევას ვკარგავთ.

ZEIT ONLINE: რა შეგვიძლია გავაკეთოთ ამასთან დაკავშირებით?

კრისტიან დროსტენი: მეტნაკლებად რაციონალური გამოსავალი, მოკლე გზები უნდა ვიპოვოთ. თუ აღმოჩნდება, რომ ოჯახში ერთი ადამიანი ინფიცირებულია, უნდა ჩავთვალოთ, რომ ოჯახის დანარჩენი წევრებიც ინფიცირებულები არიან, ტესტირების გარეშე. იმიტომ, რომ ვიცით, რაც შეიძლება მოხდეს. თუ ოჯახის ერთი წევრი დაინფიცირდება, ის ვირუსს ყველას გადასდებს. თუ იტყვი, რომ მთელი ოჯახი ინფიცირებულია, საკმაო რაოდენობის ტესტებს დაზოგავ.

წარმოიდგინეთ, რომ თქვენ დაინფიცირდით, თქვენი ცოლი კი ტესტის გასაკეთებლად წავიდა, თუმცა, იმ ეტაპზე უარყოფითი პასუხი მიიღო და კვლავ შინ დაბრუნდა. ეს გონივრულ აზრს მოკლებულია. ამიტომ, უმჯობესია, თუ მთელი ოჯახი იზოლირდება. ჰოლანდიაში ამას უკვე აკეთებენ. მე ვურჩევ გერმანიას, იმუშაოს ამაზე.

ZEIT ONLINE: სხვა რა არჩევანი, გამოსავალი არსებობს?

კრისტიან დროსტენი: რაღაც მომენტში, საეჭვო შემთხვევები გამოვლინდება მხოლოდ სიმპტომებზე დაყრდნობით და შემდეგ სტატისტიკურად აისახება. ამავდროულად, ხელმისაწვდომი ტესტები მხოლოდ იმ ადამიანებისთვის იქნება შენახული, ვინც განსაკუთრებული რისკის ქვეშაა. სხვა შემთხვევაში, თუ, დავუშვათ ჯანმრთელი სტუდენტი არის თავის სახლში, ტახტზე წამოწოლილია და ფილმებს უყურებს, არ მაინტერესებს, ის კოვიდ-დადებითია თუ უარყოფითი. ის უბრალოდ უნდა დარჩეს სახლში და გამომჯობინდეს. მაგრამ როცა 70 წლის პაციენტი ხდება ცუდად და სახლში იზოლირებულია, მირჩევნია, მას ტესტირება ჩავუტარო, რომ ყოველ ორ დღეში ტელეფონით ვეკონტაქტო და ვკითხო, როგორ სუნთქავს. ამ შემთხვევაში ის ჰოსპიტალში დროულად მოხვდება და არ გახდება პაციენტი ჩაკეტილი ფილტვებით, რომელსაც სასწრაფოდ სჭირდება ინტენსიური თერაპიის განყოფილებაში მოთავსება.

ZEIT ONLINE: გვექნება თუ არა მალე ახლა არსებულზე სწრაფი ტესტები?

კრისტიან დროსტენი: ზოგიერთი მათგანი კომერციულადაც ხელმისაწვდომია. უმეტესი მათგანი ანტისხეულებზეა (სისხლის ანალიზი) დამყარებული. მათი ხარისხიც განსხვავდება და მხოლოდ ინფიცირებიდან 10 დღის შემდეგ მუშაობს, მას შემდეგ, რაც პაციენტის ორგანიზმი ანტისხეულებს გამოიმუშავებს. პირველი ათი დღის განმავლობაში ეს ტესტები ფაქტობრივად ბრმები არიან. უნდა დაველოდოთ, როდის შეიქმნება ანტიგენზე (ნაცხზე) დამყარებული ტესტები, რომლებსაც ვირუსის პროტეინების ამოცნობა შეუძლიათ. ეს ტესტები იმუშავებენ, როგორც ფეხმძიმობის ტესტები და ისინიც ისევე მალე მოგვცემენ პასუხს. თუ ეს ტესტები კარგად იმუშავებს, არსებულს ჩაანაცვლებს. იმედია, ეს მაისისთვის მოხდება.

ZEIT ONLINE: იმ დროისთვის შესაძლოა მილიონობით ადამიანი იყოს ინფიცირებული. არიან თუ არა გერმანიის კლინიკები ამისთვის კარგად მომზადებულები?

კრისტიან დროსტენი: ახლავე უნდა შევამციროთ რიცხვები. სხვა შემთხვევაში ვერ შევძლებთ, ამას გავუმკლავდეთ. სხვა შემთხვევში, გვექნება ზუსტად იგივე პრობლემები, რა პრობლემებიც რამდენიმე კვირაა, იტალიას აქვს. ჩვენ გვაქვს მეტი საწოლი და შეიძლება ოდნავ უკეთესად გადამზადებულებიც ვართ. მაგრამ, მიუხედავად იმისა, რომ ინტენსიური თერაპია გერმანიაში კარგია, ამისთვის საკმარისი მაინც ვერ იქნება. იმ სურათის მიხედვით, რომელიც ახლა იკვეთება, ჩვენ არსებული ინტენსიური ზრუნვის საშუალებების გაორმაგება მოგვიწევს იმისთვის, რომ მივაწოდოთ ხელოვნური სუნთქვის აპარატი ყველას, ვისაც ეს დასჭირდება.

ZEIT ONLINE: გერმანიის ფედერალურმა და ადგილობრივმა მთავრობებმა საგანგებო ვითარებაში სამოქმედო გეგმა შეიმუშავეს.

კრისტიან დროსტენი: ის კარგი გეგმაა. ამასთან დაკავშირებით, ჩვენ გვჭირდება დრო, რომელსაც, ვფიქრობ, არსებული ზომებით, მოვიგებთ. ახლა ის ფაზაა, როცა ხელოვნური სუნთქვის აპარატებს ჯერაც ვუკვეთავთ და ჰოსპიტლებში პალატები ცარიელია. ყველა ეს შენობა ჰოსპიტალს ეკუთვნის. ჩვეულებრივ, ისინი ოფისებად გამოიყენებოდა. ახლა ისინი დაცარიელდა და პალატებად გადაკეთდება, სადაც ვენტილატორებიც იქნება. ამ პროცესის დასრულებას რამდენიმე კვირა დასჭირდება. სწორედ ამ რამდენიმე კვირის მოგებას ვცდილობთ, ოღონდ არა პირველ რიგში ვაქცინის შექმნისთვის.

ZEIT ONLINE: მოდი, თავად ვირუსზე ვისაუბროთ. თქვენ კორონავირუსებს მრავალი წელია, იკვლევთ. ყველაზე მეტად რა გაკვირვებთ SARS-CoV-2-ში?

კრისტიან დროსტენი: ცალსახად ის ფაქტი, რომ ის ცხვირ-ხახაში მრავლდება. Sars-ი, რომელიც 2002-2003 წლებში გავრცელდა, ცხვირ-ხახაში არ ჩერდებოდა. Sars-ით ინფიცრებულებს თავიანთ სხეულებში გაცილებით ნაკლები ვირუსი ჰქონდათ და პათოგენებიც გაცილებით ნაკლებად გადამდები იყო. ასევე, ახალი კორონავირუსი შეიცავს გასაოცარ ბიოლოგიურ სიახლეს: დაყოფის ადგილს ვირუსის ზედაპირულ ცილაში.

ZEIT ONLINE: რა არის განსაკუთრებული ამ დაყოფის ადგილში?

კრისტიან დროსტენი: ცილოვანი ზედაპირი შეიძლება გაიჭრას, იქ ვირუსი მომწიფდეს და სხვა უჯრედში გადავიდეს. და ამ დაყოფის ადგილმა შესაძლოა საშუალება მისცეს ვირუსს, გამრავლდეს მაშინაც კი, თუ ის სულ ახლახან გამოიყო ახალ ინფიცირებულ უჯრედში. ის ქაღალდის ფურცელივითაა, რომლის ბლოკნოტიდან ამოხევაც მარტივია, იმიტომ, რომ ის პერფორირებულია, დახვრეტილია. SARS-CoV-2-იც ასეთივეა პერფორაციის კუთხით.

ZEIT ONLINE: რას ნიშნავს ეს დაავადებისთვის?

კრისტიან დროსტენი: ჩვენ ეს ჯერ კიდევ არ ვიცით დანამდვილებით. შესაძლოა, ამან საშუალება მისცა ვირუსს, მომწიფებულიყო და ერთიდან მეორე უჯრედში გადასასვლელად მომზადებულიყო. ასევე, ეს შესაძლოა იყოს მიზეზი, რის გამოც SARS-CoV-2 ასე ადვილად ვითარდება ხახაში და ასე ადვილად გადაეცემა ერთი ადამიანიდან მეორეს. ჩვენ ეს ყველაფერი ჯერაც გასარკვევი გვაქვს.

ZEIT ONLINE: ისევე, როგორც სიკვდილიანობის ზუსტი მაჩვენებლის საკითხი.

კრისტიან დროსტენი: ამ მომენტში არის სხვა ცვლადი, რომელიც უფრო მნიშვნელოვანია: ე.წ ინფექციის სიკვდილიანობის კოეფიციენტი. ის მოიცავს ინფექციის გამო დაღუპული ადამიანების პროცენტულ მაჩვენებელს, მათ შორის ისეთებსაც, რომლებსაც კორონავირუსის სიმპტომები არ ჰქონიათ ან ცოტა ჰქონდათ და ამის გამო არ აღურიცხავთ დადასტურებულ შემთხვევად. ამდენად, ეს იქნება იმის შეფასებაც, რამდენად მაღალია არაიდენტიფიცირებული შემთხვევების რაოდენობა. რამდენ ადამიანს ჰქონდა ინფექცია ისე, რომ საერთოდ არ ჰქონიათ სიმპტომები ან მხოლოდ ყელი ტკიოდათ? გერმანიაში ინფიცირებულ პირველ პირებს შორის, რომლებიც სიღრმისეულად შევისწავლეთ კვლევისთვის, ასეთ ადამიანები ცოტანი იყვნენ. ამ ეტაპზე ხშირად მესმის, რომ შემთხვევების 80% მსუბუქი სიმპტომებით ხასიათდება. მაგრამ ჩემი შთაბეჭდილება ასეთია: იქნებ მათი რიცხვი გაცილებით მეტია. ამის ცოდნა მნიშვნელოვანი იქნება.

ZEIT ONLINE: ხანდაზმული და ავადმყოფი ადამიანები განსაკუთრებული რისკის ქვეშ არიან. მაგრამ ისევ და ისევ, არიან 30 წლის ასაკის ადამიანებიც, რომლებსაც ინტენსიური თერაპია დასჭრდათ ან დაიღუპნენ. რატომ მოხდა ეს?

კრისტიან დროსტენი: ის, რომ ახალგაზრდები მძიმედ ავად ხდებიან, ზოგ შემთხვევაში სხვა რესპირატორული დაავადებების გამოა. მაგრამ ხშირად ჩვენ ადამიანების შესახებ არაფერი ვიცით. თქვენ მედიაში წერთ ხოლმე: "35 წლის კაცი ინტენსიური თერაპიის განყოფილებაშია". მაგრამ შეიძლება ამ 35 წლის კაცს სერიოზული თანმხლები დაავადება ჰქონდეს. მაგალითად, ჩვენ ვიცით, რომ მძიმე წონა Covid 19-ისთვის რისკ ფაქტორია, ისევე, როგორც გულ-სისხლძარღვთა დაავადებები და სხვა. პნევმონია გულ-სისხლძარღვების მუშაობაზე ზეწოლას ახდენს, ძაბავს მას, თუ ეს სისტემა უკვე დაზიანებულია, ზოგჯერ შეიძლება ამ ზეწოლას ვერ გაუძლოს. და 35-დან 50 წლის ასაკამდე ბევრი ადამიანია, რომელიც ასეთი რისკ-ფაქტორებით ცხოვრობს. კიდევ ერთი ჰიპოთეზა ისაა, რომ ზოგმა შესაძლოა ვირუსის დიდი დოზა პირდაპირ ფილტვებში ჩაისუნთქოს. შემდეგ ვირუსი მომენტალურად ვრცელდება რესპირატორული ტრაქტის სიღრმეში, ყელის, ცხვირ-ხახის არედან იმუნური წინააღმდეგობის გარეშე. ასეთ შემთხვევაში ადამიანები შეიძლება მართლა ძალიან ცუდად გახდნენ, ორგანიზმს კი ამისთვის წინააღმდეგობის გაწევის საშუალება ჯერ არ აქვს. როგორც ვთქვი, ეს ჰიპოთეზაა.

ZEIT ONLINE: გამომდინარე იქიდან, რა ინფორმაციაც ახლა გვაქვს, კაცები მეტად ავადმყოფობენ, ვიდრე ქალები. აქვს თუ არა რამე ახსნა იმას, თუ რატომ არის ასე?

კრისტიან დროსტენი: ჩვენ ეს ზუსტად არ ვიცით. შესაძლოა, რომ ისეთი რისკ ფაქტორები, რომლებიც ახლა განვიხილეთ, კაცებში უფრო გავრცელებულია. ზოგიერთ კვლევაში ასევე მითითებულია, რომ ის, რასაც ვირუსი ეყრდნობა, განსაკუთრებით გვხვდება აზიელების, უფრო კი აზიელი კაცების უჯრედებში. მაგრამ, მე ვფიქრობ, ეს ახსნა უბრალოდ კარგად ერგება არსებულ სურათს და ამიტომ მოვახდინეთ ამ ფორმით მისი ინტერპრეტირება. გარდა ამისა, ვირუსი ჩინეთის გარეთაც ფართოდ გავრცელდა, ამიტომ არ ვფიქრობ, რომ ეს არგუმენტი საფუძვლიანია. უბრალოდ, ჯერ მონაცემები საერთოდ არ გვაქვს.

ფოტო: Zeit Online

ZEIT ONLINE: თქვენ არაერთხელ თქვით, რომ ჯერჯერობით ვერც წამლები და ვერც ვაქცინა ვერ შეიქმნება. საერთოდ არ არის იმედი?

კრისტიან დროსტები: შესაძლებელია, რომ ვითარება ისე გაუარესდეს, რეგულაციები შეჩერდეს. ვინ წარმოიდგენდა, რომ ვაქცინის მიღების გარკვეული ასპექტები შეიძლება უგულებელყოფილ იქნას და აცრები, რომლებიც არ იქნება სათანადოდ გამოცდილი, ადამიანებზე გამოიყენონ. ეს ძალიან არაბუნებრივი და სპეკულაციური სცენარია, მაგრამ თუ ვითარება ძალიან გაუარესდება (და ამ ეტაპზე არ მინდა, ეს გამოვრიცხო), შესაძლოა ასეთი რამ მოხდეს კიდეც. არაერთ ბიოტექ კომპანიას უკვე აქვს შემუშავებული შესაძლო ვაქცინები.

ZEIT ONLINE: აშშ-ში მოხალისეს უკვე გაუკეთეს შესაძლო ვაქცინა, რომელიც კერძო ბიოტექ-კომპანიამ შეიმუშავა. ის რიბონუკლეინის მჟავაზეა დამყარებული, გენეტიკური მასალის პატარა ნაწილაკებზე. არის თუ არა ეს სწორი მიდგომა?

კრისტიან დროსტენი: მართლა არ შემიძლია ამის თქმა. მე ვფიქრობ, ეს სწრაფი მიდგომაა. არ ვიცი, არის თუ არა ეს ის მასობრივი მიდგომა, რომელიც ჩვენ ახლა გვჭირდება. ამ მომენტისთვის, ამ დროისთვის უფრო სავარაუდო ალბათ ისაა, რომ ვირუსის ზედაპირული ცილა წარმოიშობა დიდი ოდენობით, ერთბაშად და მის წინააღმდეგ იმუნური სისტემა დიდი რაოდენობით ანტისხეულებს გამოიმუშავებს. ზოგიერთი კომპანია ამ მიდგომას მიჰყვება. ამ ტიპის ვაქცინა შესაძლოა რისკ-ჯგუფებისთვის იქნას გამოყოფილი. თუ ვითარება ძალიან დამძიმდება, შეიძლება მსგავსი რამეც მოხდეს.

ZEIT ONLINE: რა შემთხვევაში იტყვით, რომ ვითარება საკმარისად ცუდია იმისთვის, რომ ასეთი ნაბიჯები გადაიდგას?

კრისტიან დროსტენი: არ შემიძლია და არ მინდა ამ მომენტის წარმოდგენა.

ZEIT ONLINE: არის თუ არა რამე მედიკამენტების შექმნის იმედი?

კრისტიან დროსტენი: ჩემი აზრით, ანტივირუსული წამალი რემდესივირი საუკეთესო ვარიანტია. თუმცა, ამ მომენტისთვის, მწარმოებელი მის გამოყენებას მხოლოდ იმ ადამიანებთან მიმართებაში უშვებს, ვისი ჯანმრთელობის მდგომარეობაც სერიოზულად მძიმეა, მხოლოდ მათ მიმართ იყენებენ, მკაცრად გაწერილი პროტოკოლით და მხოლოდ მცირე ვადით. იდეალურ შემთხვევაში, ის პაციენტებისთვის უფრო ადრე უნდა მიეწოდებინათ, ამისთვის კი მისი მეტი რაოდენობა ყოფილიყო ხელმისაწვდომი. ახლა ჩვენ უნდა დაველოდოთ მის პირველად შედეგებს.

ZEIT ONLINE: სხვა წამლები?

კრისტიან დროსტენი: ვერ ვხედავ რეალურ ალტერნატივებს, მათ შორის, ვერც მალარიის წამალ ქლოროქინს, ვერც აივ შიდსისთვის განკუთვნილ წამლებს - რიტონავირს/ლოპინავირს. ორივე მათგანი კლინიკური კვლევების საგანია, მაგრამ შედეგები დამაჯერებელი არ ყოფილა.

ZEIT ONLINE: იტალია ექსპერიმენტის ატარებს და უკვე განკურნებული პაციენტების პლაზმას იყენებს არსებული პაციენტების სამკურნალოდ.

კრისტიან დროსტენი: ეს მაცდუნებელი იდეაა. მკურნალობის შედეგების შესახებ ინფორმაცია ჯერაც არ გამოქვეყნებულია, მაგრამ არის ბევრი ახალგაზრდა, ჯანმრთელი პაციენტი, რომელიც იდალური იქნებოდა პლაზმის დონორად. როცა ისინი დაინფიცირდნენ, საუკეთესო ანტისხეულებიც გამოიმუშავეს. თუ ამ ანტისხეულებს პაციენტებს საჭირო დროს მიაწვდიან, ნამდვილად არის განკურნების შესაძლებლობა. ჩემი აზრით, ალბათ 2 თვეში, კონკრეტული შემთხვევების პირველი მცირე დასკვნები ხელმისაწვდომი იქნება. მაგრამ სწრაფი და ფართომასშტაბიანი შედეგები არც ერთი ამ ზომიდან მოსალოდნელი არ არის.

ZEIT ONLINE: რას გვეტყვით გაზაფხულზე ჰაერის ტემპერატურის მატებაზე?

კრისტიან დროსტენი: სავარაუდოდ, ამას დიდი ეფექტი არ ექნება. მხოლოდ სითბო ვერ შეძლებს, ვირუსის გავრცელება შეაჩეროს, თუმცა მაინც შეიძლება, ინფექციასთან ბრძოლას ცოტათი დაეხმაროს და იზოლაციის კუთხით მიღებული ზომების დახმარებით, ველი, რომ დაახლოებით ერთ თვეში გარკვეულ შედეგს ვნახავთ.

ZEIT ONLINE: და შემდეგ? რა მოხდება ამის შემდეგ?

კრისტიან დროსტენი: ალბათ უნდა ვივარაუდოთ, რომ დაახლოებით 1 წლის მანძილზე მოგვიწევს საგანგებო მდგომარეობის რეჟიმში ცხოვრება. თუმცა, მისი განხორციელების ზომები სხვადასხვა იქნება, ჩვენ მათ დავაკორექტირებთ და მოვირგებთ. რაღაც ზომები ეტაპობრივად მოძველდება. მაგრამ ამ დროიდან აღდგომის მომდევნო კვირამდე უნდა ვიმოქმედოთ მკაცრი ზომებით და ვაკონტროლოთ დადასტურებული შემთხვევების რაოდენობის განვითარება.

ZEIT ONLINE: ერთი წელი საგანგებო მდგომარეობის რეჟიმში? როგორი გახდება ჩვენი ცხოვრება ამ პერიოდის განმავლობაში?

კრისტიან დროსტენი: არავინ იცის, ახლა ამის წარმოდგენა არც მე შემიძლია. სულ მცირე, სკოლებისთვის მაინც უნდა გამოიძებნოს რამე გამოსავალი, ეს ყველაზე მნიშვნელოვანი საკითხია. უნივერსიტეტებისთვის, ვფიქრობ, ნორმალურია ერთი ან ორი სემესტრის დაკარგვა. მაგრამ სკოლებში მთელი სასწავლო წლის დაკარგვა ძალიან რთული იქნება, ვინაიდან ამაზე ბევრი რამ არის დამოკიდებული და ეკონომიკაზე არანაკლებ მნიშვნელოვანია. ჩვენ გამოსავალს ვიპოვით, მათ შორის მათთვისაც, ვინც განსაკუთრებული რისკის ქვეშაა.

ZEIT ONLINE: თუ ბებია-ბაბუებს შვილიშვილების ნახვა მოუნდებათ?

კრისტიან დროსტენი: ალბათ შესაძლებელი იქნება, შვილიშვილებმა ტესტი ჩაიტარონ და მხოლოდ ამის შემდეგ წავიდნენ ბებიის და ბაბუის სანახავად, რათა დარწმუნებულები იყვნენ, რომ მათ ინფექციას არ გადასდებენ. ასეთ დეტალებს მეტი სიცხადე, მეტი განმარტება სჭირდება. პოლიტიკური გადაწყვეტილებებით, სოციალური ცხოვრება შეჩერდა, მაგრამ იმედია, სამეცნიერო მიგნენებზე დაყრდნობით ამ გადაწყვეტილებებში ცვლილებების შეტანაც იქნება შესაძლებელი.

ZEIT ONLINE: როდის შეეძლებათ ადამიანებს სამსახურებში დაბრუნება?

კრისტიან დროსტენი: ადამიანებს ტესტირება უნდა ჩაუტარდეთ და ამის შემდეგ წავიდნენ სამსახურებში. მას შემდეგ, რაც ანტიგენზე დამყარებული ტესტები ხელმისაწვდომი გახდება, შესაძლებელი გახდება მათი პროფესიულ წრეებზე გამოყენება. ამასთან, თუ ჩვენ დავუშვებთ, რომ ინფექციის მიმდინარე ტალღისას, შემოდგომოსთვის გერმანიაში 10-დან 15 მილიონ ადამიანამდე იქნება დაინფიცირებული, მალე გვეყოლება დიდი რაოდენობა ადამიანებისა, რომელთაც გამომუშავებული ექნებათ ანტისხეულები. ადამიანები იმუნურები გახდებიან. ამის შემდეგ, იქნებიან ექიმები და ექთნები, რომელთაც ნიღბების გარეშე შეეძლებათ მუშაობა, სხვა პროფესიულ ჯგუფებში კი ასევე იქნებიან პირები, რომლებიც იტყვიან: "მე ეს უკვე გავიარე". და მათი რიცხვი მუდმივად გაიზრდება.

ZEIT ONLINE: რამდენი ხნის განმავლობაში იქნებიან ეს ადამიანები იმუნურები?

კრისტიან დროსტენი: ის ადამიანები, რომლებიც კორონავირუსით დაინფიცირდნენ, სავარაუდოდ, იმუნურები იქნებან მთელი პანდემიის განმავლობაში, ჩემი აზრით, მომდევნო 2 წლის მანძილზე. და თუნდაც ისინი ხელახლა დაინფიცირდნენ, გაცილებით ნაკლებად დამაზიანებელი იქნება. ამ ეტაპზე ეს არის, ჩემი აზრით, ვითარებიდან გამოსავალი.

ZEIT ONLINE: როგორ მივხვდებით, ვინ არის უკვე ინფიცირებული?

კრისტიან დროსტენი: მოსახლეობის ფართომასშტაბიანი და ჯვარედინი კვლევებით, პირველად ზაფხულში და განმეორებით ოქტომბერში. იდეალური იქნება, თუ ისინი სისხლის ბანკების დახმარებით ჩატარდება, რომლებიც სისხლს აიღებენ და შეინახავენ. მიზანი უნდა იყოს თითოეული ასაკობრივი ჯგუფისთვის შეფასების დადგენა იმაზე, თუ რამდენმა ადამიანმა მოიხადა ვირუსი და გამოიმუშავა ანტისხეულები. ასე გაირკვევა, მივაღწიეთ თუ არა ინფიცირების 60%-70%-ს, ეს არის მოსახლეობის ის წილი, რომელიც, სავარაუდოდ, საბოლოოდ ინფიცირდება.

ZEIT ONLINE: და ამის შემდეგ ვირუსი წელწადნახევარში გაქრება?

კრისტიან დროსტენი: არა, ის გაუდგება სხვა კორონავირუსების გზას, რომლითაც სეზონზე მხოლოდ ცივდები. ჩვენ მოგვიწევს მასთან ერთად ცხოვრება, თუმცა, ის აღარ იქნება ისეთი საშიში, როგორიც ახლაა.

ZEIT ONLINE: ეს ძალიან დიდ გამოწვევას ჰგავს. ვართ თუ არა ამისთვის მზად, როგორც საზოგადოება?

კრისტიან დროსტენი: მძიმე დრო გვიდგას, იქნება უზარმაზარი ეკონომიკური დანაკარგები. მაგრამ დიახ, რა თქმა უნდა, ჩვენ ამას მოვერევით. უნდა მოვერიოთ.

ახალი ვიდეო მეტი ვიდეო

ვანო მერაბიშვილმა საპატიმრო დატოვა (LIVE)

კომენტარები