თბილისის ინფექციური საავადმყოფოს სამედიცინო დირექტორის მარინა ეზუგბაიას ცნობით, 33 პაციენტიდან, რომელიც კლინიკაში მკურნალობს, შვიდს მძიმე პნევმონია აქვს, მათგან ორის მდგომარეობა მძიმეა, - "მიუხედავად დაწყებული მკურნალობისა, დაავადება პროგრესირებს, მაგრამ ძალიან აგრესიულად არა, იმედი გვაქვს მათი მდგომარეობაც დასტაბილურდება და გამოჯანმრთელდებიან".
ეზუგბაიას ინფორმაციით, ინფექციური საავადმყოფოდან ახალი კორონავირუსისგან გამოჯანმრთელებული 37 პაციენტია გაწერილი.
რაც შეეხება 6 ახალ დადასტურებულ შემთხვევას, ეზუგბაიას განმარტებით, არც ერთი მათგანი არაა შიდა გავრცელების შემთხვევა, ყველას ინფიცირების წყარო ცნობილია, - "ეს არაა მეორეული, მესამეული ან მეოთხეული გადაცემა".
8 აპრილის დილის მონაცემებით, საქართველოში კორონავირუსით ინფიცირების 214 დადასტურებული შემთხვევაა აღწერილი, აქედან 50 ადამიანი გამოჯანმრთელდა. საკარანტინო ზონაში 4 722 პირი რჩება, ხოლო სტაციონარში მეთვალყურეობის ქვეშ - 408.