ზუგდიდში კორონავირუსისგან პირველი პაციენტი, 67 წლის კაცი გამოაჯანმრთელდა. ინფორმაციას სამეგრელო-ზემო სვანეთის სახელმწიფო რწმუნებული, ალექსანდრე მოწერელია ავრცელებს.
მისივე ინფორმაციით, 67 წლის კაცი, რომელიც ქვეყანაში თურქეთიდან შემოვიდა, პირველი პაციენტი იყო, რომელსაც რეგიონში კორონავირუსი დაუდასტურდა. რეგიონში ამ დროისთვის კორონავირუსი 1 ადამიანს, შუახნის ქალს უდასტურდება - ის ოკუპირებული აფხაზეთიდან გადმოიყვანეს.
საქართველოში კორონავირუსით ინფიცირების 242 შემთხვევაა დადასტურებული. მათგან 60 ადამიანი გამოჯანმრთელდა, 3 პაციენტი გარდაიცვალა.
კორონავირუსის გავრცელების პრევენციის მიზნით, 21 აპრილამდე საქართველოში საგანგებო მდგომარეობა და კომენდანტის საათი მოქმედებს. მკაცრ საკარანტინო რეჟიმზეა ბოლნისის, მარნეულის და ლენტეხის რაიონები.