ფოთში კორონავირუსით ინფიცირების პირველი შემთხვევა გამოვლინდა. ფოთის საზოგადოებრივი ჯანდაცვის ცენტრის ხელმძღვანელის ნანა მხეიძის თქმით, ინფიცირებული ექიმია, რომელიც ქობულეთის კლასტერს განეკუთვნება.
მისი თქმით, ფოთში დღეს დამატებით 6 საეჭვო პაციენტზე ელოდებიან პასუხს ლუგარის ლაბორატორიიდან.
"პირველი შემთხვევაა ფოთში. დაუდასტურდა ექიმს, რომელიც არის ქობულეთის კლასტერიდან. პირველ რიგში ვიკვლევთ ოჯახის წევრებს, შემდეგ გავაგრძელებთ კვლევას. პაციენტი თვითიზოლაციაში იმყოფებოდა. ველოდებით 6 პაციენტის პასუხს. რაც შეეხება დადასტურებულ შემთხვევას, მისი ოჯახის წევრებს აეღოთ ანალიზი და მიმდინარეობს დაკვირვება," - თქვა მხეიძემ.
საქართველოში COVID-19-ით ინფიცირების 306 შემთხვევაა დადასტურებული. მათგან 69 პაციენტი გამოჯანმრთელდა, 3 გარდაიცვალა.