მოსკოვის N180 პოლიკლინიკის მთავარი ექიმი იულია სერგეევა ახალი კორონავირუსული ინფექციით გარდაიცვალა. ინფორმაცია ამის შესახებ მოსკოვის ჯანდაცვის დეპარტამენტის ვებგვერდზეა გამოქვეყნებული.
"გართულება, რომელიც გამოიწვია კორონავირუსულმა ინფექციამ, სიცოცხლესთან შეუთავსებელი აღმოჩნდა", - აცხადებენ დეპარტამენტში.
დეპარტამენტის ცნობითვე, სერგეევა ფილტვების ხელოვნურ ვეტილაციაზე 43 დღის განმავლობაში იმყოფებოდა.
Meduza-ს ცნობით, რუსი ექიმები ადგენენ სამედიცინო სფეროს იმ წარმომადგენლების სიას, რომლებიც ახალი კორონავირუსის პანდემიისას გარდაიცვალნენ. მათი რაოდენობა ამ დროისთვის 113-ია.
რუსეთის ხელისუფლების მიერ მოწოდებული ინფორმაციის მიხედვით, ამ დროისთვის ქვეყანაში ახალი კორონავირუსის 177 160 შემთხვევაა დადასტურებული, საიდანაც 1 625 ადამიანი გარდაიცვალა.
ბოლო 24 საათში რუსეთში ახალი კორონავირუსი 11 231 ადამიანს დაუდასტურდა, რაც ქვეყანაში ერთ დღეში დადასტურებულ შემთხვევათა ყველაზე მაღალი მაჩვენებელია. შედეგად, რუსეთმა ინფიცირებულების რაოდენობით გერმანიასა და საფრანგეთს გადაუსწრო.
6 მაისს ახალი კორონავირუსი რუსეთის კულტურის მინისტრს, ოლღა ლიუბიმოვას, დაუდასტურდა. ინფიცირებულია რუსეთის პრემიერმინისტრი, მიხაილ მიშუსტინიც. ასევე, კორონავირუსი დაუდასტურდა რუსეთის მშენებლობის მინისტრს, ვლადიმერ იაკუშევს.