Banksy-მ აშშ-ში ჯორჯ ფლოიდის მკვლელობასთან დაკავშირებით ახალი ნახატი შექმნა.
ნახატზე ჩანს, რომ შავკანიანი ადამიანის ფოტოსთან სანთელია დანთებული, რომელიც კედელზე ჩამოკიდებულ აშშ-ის დროშას წვავს.
"თავიდან ვფიქრობდი, რომ უნდა გავჩუმებულიყავი და ამ საკითხთან დაკავშირებით შავკანიანი ადამიანებისთვის მომესმინა.
თუმცა, რატომ უნდა გავაკეთო ეს? ეს მათი პრობლემა არ არის, ჩემი პრობლემაა.
ფერადკანიანებს სისტემამ უღალატა - თეთრმა სისტემამ. როგორც გაფუჭებული მილი ტბორავს იმ ადამიანების სახლს, ვინც ქვემოთ ცხოვრობენ. გაუმართავი სისტემა მათ ცხოვრებას ტანჯვად აქცევს, მაგრამ ამის მოგვარება მათი პრობლემა არ არის. მათ არ შეუძლიათ - ამ სახლში მათ ზემოთ სართულზე არავინ აუშვებს.
ეს თეთრკანიანების პრობლემაა და თუ თეთრკანიანები არ მოაგვარებენ მას, ვიღაცას მოუწევს, მაღლა ავიდეს და კარი შეამტვრიოს", - წერს Banksy.
საპროტესტო აქციები აშშ-ში 25 მაისიდან მიმდინარეობს, მას შემდეგ, რაც მინეაპოლისში 46 წლის აფროამერიკელი კაცი ჯორჯ ფლოიდი პოლიციელმა დაკავებისას მოკლა - ფლოიდს, რომელიც მიწაზე იწვა და ამბობდა, რომ ვერ სუნთქავდა, პოლიციელი მუხლით ყელზე აწვებოდა.
საპროტესტო აქციების გამო აშშ-ის 15 შტატსა და დედაქალაქ ვაშნგტონში ეროვნული გვარდიაა მობილიზებული, დაწესდა კომენდანტის საათი. მომიტინგეთა ნაწილმა მაღაზიები დაარბია და გაძარცვა. მათ დააზიანეს კერძო საკუთრება, ცეცხლი წაუკიდეს პოლიციის შენობას. 31 მაისისთვის ქალაქში კერძო ბიზნესის 270-მდე შენობა დარბეული ან სრულად განადგურებული იყო.
ვრცლად აშშ-ში მიმდინარე მოვლენების შესახებ - წაიკითხეთ აქ.
Banksy-ს სხვა ნამუშევრები - ნახეთ აქ.