"ლელო საქართველოსთვის" წევრი გრიგოლ გეგელია ამბობს, რომ პარტიის ლიდერის, მამუკა ხაზარაძის მიერ გუშინ გაკეთებული განცხადება ჰომოფობიური არ ყოფილა.
მამუკა ხაზარაძის თქმით, საქართველოს კონსტიტუციაში ქორწინების შესახებ ჩანაწერი "კარგად არის განსაზღვრული და გადახედვა არ სჭირდება". ხაზარაძე ირწმუნება, რომ საქართველოში უმცირესობების უფლებები ძალიან კარგად არის დაცული.
ტაბულა გეგელიას დაუკავშირდა, იმის გასარკვევად, ეთანხმება თუ არა მისი ლიდერის მოსაზრებებს. გეგელიამ კონკრეტულ პასუხებს თავი აარიდა და ლელოს ძირითად მიზნებზე საუბრობდა, თუმცა თქვა, რომ:
"აბსოლუტურად არ იყო ჰომოფობიური ხაზარაძის განცხადება და ძალიან კომიკური მგონია, თუ ჰომოფობიურად ჩავთვლით. იმიტომ, რომ ჩვენ ვამბობთ, რომ ლელო ემხრობა ინკლუზიურ საქართველოს".
გეგელია ჩვენთან საუბარში ამბობს, რომ მისი აზრით, "საქართველოს კანონმდებლობა და საქართველოს სახელმწიფო ინსტიტუტები არ არის მომართული მოქალაქეთა თავისუფლებაზე ან თანასწორობაზე".
მისივე აზრით, მამუკა ხაზარაძემ გუშინდელ განცხადებაში იგულისხმა, რომ საქართველოს კანონმდებლობა საკმაოდ კარგად არეგულირებს თანასწორობის საკითხს, მაგრამ არ ხდება მისი აღსრულება.
ამ ორი მოსაზრების გამოთქმის შემდეგ, დამაზუსტებელ კითხვაზე, უარყოფს იმ ფაქტს, რომ არ ეთანხმება პარტიის ლიდერს. აქვე განმარტავს, რომ მისი პირადი პოზიცია არის ლელოს პოზიცია - "ლელოს კი არ ვთამაშობ".
ტაბულა: თქვენი აზრით, ოჯახის ცნება კარგად არის განსაზღვრული კონსტიტუციაში და გადახედვა არ სჭირდება?
გეგელია: კონსტიტუცია, რომელიც დღეს გვაქვს არაერთი მიმართულებით არის არაადეკვატური და ბუნდოვანი. საქართველოს სჭირდება ახალი კონსტიტუცია და საერთოდ სხვანაირი. ეს კონსტიტუცია არ არის მომართული არც თავისუფლებაზე, არც თანასწორობაზე და არც საქართველოს სწორ მოწყობაზე.
ტაბულა: კონკრეტულ ჩანაწერზე გეკითხებით ოჯახის შესახებ.
გეგელია: პირველი კურსის სტუდენტსაც რომ ჰკითხოთ, ის გეტყვით, რომ კონკრეტულად ერთი ჩანაწერით არ დგინდება, კონსტიტუცია არის კანონთა მწკრივი.
ტაბულა: ხაზარაძე ამბობს, რომ კონსტიტუციაში ძალიან კარგად არის განსაზღვრული ოჯახის საკითხი.
გეგელია: მამუკა ხაზარაძე ამბობს, რომ კანონმდებლობა არ სრულდება ადეკვატურად. ჩემი აზრით, ის გულისხმობდა იმას, რომ საქართველოს კანონმდებლობა საკმაოდ კარგად არეგულირებს თანასწორობის საკითხს, მაგრამ არ ხდება მისი აღსრულება.
ტაბულა: უმცირესობის უფლებები კარგად არის დაცული საქართველოში?
გეგელია: უმცირესობის უფლებები არაერთი მიმართულებით და ხშირად ირღვევა, ეს გუშინაც ძალიან ნათლად იყო თქმული და ზუსტად აქ გვაქვს კანონის აღსრულების პრობლემა. არცერთი უმცირესობის უფლება არ უნდა ირღვეოდეს.
ამ ნაწილში გეგელია კიდევ ერთხელ განმარტავს, რომ მისი და პარტიის ლიდერის პოზიციები განსხვავებული არ არის ამ საკითხზე.
"პარტიის ლიდერმა განაცხადა, რომ უმცირესობების უფლებები ირღვევა და ეს ყველაფერი არის კანონის აღსრულების პრობლემა, იმიტომ რომ კანონმდებლობა ითვალისწინებს უმეტესად თანასწორობას, მაგრამ ეს კანონმდებლობა ყოველთვის არ აღსრულდება", - ამბობს გეგელია.
გეგელიამ ინტერვიუს განმავლობაში რამდენჯერმე განმარტა, რას ემხრობა ლელო:
"ლელო ყოველთვის ემხრობოდა და ემხრობა ინკლუზიურ საქართველოს, რომელიც არის ყველა მისი მოქალაქის თანაბარი საკუთრება, სადაც კანონი არის აბსოლუტურად დაცული და უზენაესი და სადაც არცერთი მოქალაქე არავისზე ნაკლები არ არის, არავის არ ჩამოუვარდება და არ სარგებლობს ნაკლები კონსტიტუციური უფლებით. ჩვენ ვემხრობით სამართლებრივად თანასწორ სახელმწიფოს და გავაგრძელებთ ამ პროცესს".
რაც შეეხება მამუკა ხაზარაძის მეორე განცხადებას, იმის შესახებ, რომ ეკლესიისათვის მიწების გადაცემა პრობლემად არ მიაჩნია - გეგელია პასუხობს, რომ შესაბამის კანონს კარგად არ იცნობს და არ წაუკითხავს, თუმცა მიაჩნია, რომ მთავარი არის, რეგულირებული იყოს ის, რომ ხალხს ჰქონდეს წვდომა ტყეებთან და დაცული იყოს ეკოსისტემა.
ტაბულას კითხვაზე, უზრუნველყოფს თუ არა ამას საპატრიარქო, გეგელია პასუხობს, რომ:
"კანონმა და სახელმწიფომ უნდა უზრუნველყოს, რომ ყველა კერძო ქვერგოლი მუდმივად იყოს თანხვედრაში საზოგადოებრივ სიკეთესთან".
მისივე თქმით, ეკლესიისთვის მიწების გადაცემის თემას აქვს ძალინ ბევრი სხვადასხვა ასპექტი, რომელიც უნდა იქნას ჩაშლილი და ისე დანახული.
"ჩვენ ვხედავთ იმას, რომ ხელისუფლება თვითონ ვერ მართავს სახელმწიფოს და ამიტომ სწორი სახელმწიფოებრივი ჩარევის დეფიციტი იწვევს ამ გაურკვეველ ბუნდოვან პროცესს, იმას, როდესაც სხვა არასახელმწიფოებრივი ჯგუფების და მათი კომპეტენციების აღრევა ხდება", - ამბობს გეგელია.
მამუკა ხაზარაძის ჰომოფობიური განცხადება კონსტიტუციაში ქორწინების განსაზღვრის შესახებ იხილეთ აქ, ხოლო საპატრიარქოსათვის ტყეების გადაცემის შესახებ აქ.
