საქსტატის მონაცემებით, მიმდინარე წლის პირველ კვარტალში პირდაპირი უცხოური ინვესტიციების მოცულობამ 165,4 მილიონი დოლარი შეადგინა, რაც 2009 წლის პირველი კვარტლის შემდეგ ყველაზე დაბალი მაჩვენებელია.
გასული წლის პირველ კვარტალთან შედარებით კლებამ 41% შეადგინა. შედარებისთვის, 2009 წლის პირველ კვარტალში 114 მილიონის ინვესტიცია განხორციელდა, თუმცა ამ თანხის თანაფარდობა ქვეყნის იმდროინდელ მშპ-სთან უფრო მაღალი იყო, ვიდრე მიმდინარე 165 მილიონის.
ვარდნა კიდევ უფრო დრამატულია ბოლო წლების კონტექსტში - 2017 წლიდან მოყოლებული ინვესტიციების რაოდენობა საქართველოში დრამატულად შემცირდა.
შედარებისთვის 2018 წელს ინვესტიციების მოცულობა 35%-ით შემცირდა. რაც შეეხება 2019 წელს მოცულობა თითქმის იგივე დონეზე შენარჩუნდა და ზრდამ 0,2% შეადგინა.
ბოლო წლებში საქართველოში განხორციელებული უცხოური ინვესტიციების სტატისტიკა შემდეგნაირად გამოიყურება:
- 2015 წელი — $1,729 მილიარდი;
- 2016 წელი — $1,650 მილიარდი;
- 2017 წელი — $1,962 მილიარდი;
- 2018 წელი — $1,265 მილიარდი;
- 2019 წელი — $1,267 მილიარდი;
საქსტატის თანახმად, შემცირების ძირითად მიზეზები არის "მაგისტრალური გაზსადენის მშენებლობის პროექტის დასრულება და რამდენიმე საწარმოს გადასვლა საქართველოს რეზიდენტის საკუთრებაში".
უმსხვილესი ინვესტორი ქვეყანა გაერთიანებული სამეფო იყო, რომელზეც ინვესტიციათა 44.2% მოდის. მეორე ადგილზე ამერიკის შეერთებული შტატებია ჯამური ინვესტიციების 17%-ით. მესამე ადგილზე პანამაა 11.9%-ით, რომელიც ეროვნული ბანკის თანახმად ფულის გათეთრების მაღალი რისკის მქონე ქვეყნების სიაშია.
