პროკურორ ვასილ სამხარაძის მტკიცებით, მთავარი არხის მეწილის, გიორგი რურუას მხრიდან მიმალვისა და ახალი დანაშაულის ჩადენის საფრთხე არსებობს. მისი თქმით, ბრალდების მხარე ამიტომ არ დაეთანხმა შუამდგომლობას ბრალდებულებისთვის გირაოს შეფარდების შესახებ.
"დაცვის მხარეს ჰქონდა შუამდგომლობა, რათა შეცვლილიყო აღკვეთის ღონისძიება. ბრალდების მხარე არ დაეთანხმა ამ გარემოებას და მიუთითა, რომ კვლავაც არსებობს მიმალვისა და ახალი დანაშაულის ჩადენის საფრთხე. სასამართლოს მხრიდან გაზიარებულ იქნა აღნიშნული არგუმენტი და ბრალდებული დატოვა პატიმრობაში“,- თქვა პროკურორმა.
გიორგი რურუა, რომელიც მოძრაობა სირცხვილიას ფინანსურად ეხმარებოდა, 2019 წლის 18 ნოემბერს, აქციის დარბევამდე რამდენიმე საათით ადრე ცეცხლსასროლი იარაღის უკანონო შეძენა-შენახვის ბრალდებით დააკავეს.
მოგვიანებით მის საქმეს კიდევ ერთი მუხლი - სასამართლო გადაწყვეტილების შეუსრულებლობა და მისი შესრულებისთვის ხელის შეშლა დაემატა, რადგან რურუამ სასამართლოს განჩინების მიხედვით დადგენილ, დნმ-ის და თითის ანაბეჭდების ნიმუშების აღებაზე უარი განაცხადა.
რურუა ბრალს არ აღიარებს.
მისი გათავისუფლება 8 მარტის საარჩევნო შეთანხმების ნაწილია გიგი უგულავას და ირაკლი ოქრუაშვილის გათავისუფლებასთან ერთად, რომლებიც სალომე ზურაბიშვილმა შეიწყალა - ოპოზიცია და საქართველოს დასავლელი პარტნიორები რურუას პოლიტპატიმრად მიიჩნევენ და მის გათავისუფლებასაც ითხოვენ.
2020 წლის 8 მარტს აშშ-ის ელჩის რეზიდენციაში ხელისუფლებას და ოპოზიციას შორის ხელი მოწერა ხელშეკრულებას, რომელიც ორნაწილიანია და ერთი მხრივ, პოლიტიკური პატიმრების გათავისუფლებას, მეორე მხრივ კი საარჩევნო სისტემის შეცვლას და 2020 წლის საპარლამენტო არჩევნებზე მანდატების 120/30-ზე განაწილებას გულისხმობს.
ქართული ოცნება უარყოფს, რომ შეთანხმების ერთი ნაწილი პოლიტპატიმრებს ეხება, ოპოზიცია კი აცხადებს, რომ პოლიტპატიმრების არგათავისუფლების შემთხვევაში ბოიკოტს გამოუცხადებს საკონსტიტუციო ცვლილების ნაწილს.
დასავლელი პარტნიორების ზეწოლის, არაერთი კრიტიკული განცხადების და მოწოდების შემდეგ, 15 მაისს, სალომე ზურაბიშვილმა გიგი უგულავა და ირაკლი ოქრუაშვილი შეიწყალა. ქართულ ოცნებაში განაცხადეს, რომ მათთვის ეს გადაწყვეტილება მიუღებელია და რომ პრეზიდენტს ამ საკითხზე მათთან კომუნიკაცია არ ჰქონია, რაც მოგვიანებით სალომე ზურაბიშვილმა უარყო და განმარტა, რომ ქართული ოცნების ლიდერები წინასწარ გააფრთხილა ამის შესახებ.
