სამართალდამცველებმა ბანკისა და აფთიაქის დაყაჩაღებისთვის ერთი პირი, 1990 წელს დაბადებული, წარსულში ნასამართლევი და ამჟამად პირობითი მსჯავრის ქვეშ მყოფი მ.ლ დააკავეს. გარდა ამისა, 1990 წელს დაბადებული ა.შ. - დანაშაულის შეუტყობინებლობისთვის აიყვანეს.
"გამოძიებით დადგინდა, რომ მ.ლ. მიმდინარე წლის 25 ივნისს, ფონიჭალაში მდებარე საქართველოს ბანკის სერვისცენტრს ყაჩაღურად დაესხა თავს და იარაღის მუქარით გაიტაცა ბანკის კუთვნილი თანხა - 18 168 ლარის ოდენობით.
სამართალდამცველებმა, დაკავებულის ბინის ჩხრეკისას, ნივთმტკიცებად ამოიღეს 2300 ლარი,. ა. შ.-ს ავტომანქანის ჩხრეკისას - ცეცხლსასროლი იარაღის მსგავსი ნივთი, რომელიც მოწმის - ნ. ა.-ს ჩვენებით, მ.ლ.-მ ყაჩაღობის შემდგომ გადასცა ა.შ.-ს.
პოლიციამ მოწმე ნ.ა.-ს ბინის ჩხრეკისას ამოიღო დიდი რაოდენობით მედიკამენტები . მისი განმარტებით, მედიკამენტები მ.ლ.-მ მიმდინარე წლის 20 ივნისს, ერთ-ერთ აფთიაქზე ყაჩაღური თავდასხმის დროს გაიტაცა და შესანახად გადასცა მას," - აცხადებს შსს.
გამოძიება საქართველოს სისხლის სამართლის კოდექსის 179-ე მუხლის მე-3 ნაწილით და 376-ე მუხლის მე-3 ნაწილით მიმდინარეობს, რაც ყაჩაღობას და დანაშაულის შეუტყობინებლობას გულისხმობს.