"საქართველოში დემოკრატიის მხარდამჭერი კარგი გზავნილია" - ასე ეხმაურება კონგრესმენი პიტ ოლსონი მარკუეინ მალინის სტატიას, რომელიც საქართველოს ეხება.
მალინმა თავისი სტატია Twitter-ზე შემდეგი აღწერით გააზიარა:
"ქართველ ხალხს სურს, ჰქონდეს აყვავებული ეკონომიკა და უნდა, რომ საქართველო გარდაიქმნას ნამდვილ დემოკრატიულ ქვეყანად. წაიკითხეთ ჩემი მოსაზრება, რატომ უნდა დაუდგეს მათ გვერდით აშშ თავისუფლებისთვის ბრძოლაში".
ორ ივლისს The Hill-მა გამოაქვეყნა ამერიკელი კონგრესმენის, მარკუეინ მალინის მოსაზრება საქართველოს შესახებ, სადაც წარმომადგენელთა პალატის რესპუბლიკელი წევრი "თავისუფლებისთვის ბრძოლაში" აშშ-ს მიერ საქართველოს დახმარებაზე ლაპარაკობს.
როგორც კონგრესმენი სტატიის დასაწყისში წერს, ვლადიმირ პუტინის გავლენა მნიშვნელოვანი გამოწვევაა დემოკრატიისათვის მთელი მსოფლიოს მასშტაბით, რის მაგალითადაც მას მოჰყავს საქართველო.
