დარგობრივი ეკონომიკის საპარლამენტო კომიტეტის სხდომაზე კვლავ ტელეკომუნიკაციების კანონპროექტზე მსჯელობენ. კანონპროექტი კომუნიკაციების კომისიამ დააინიცირა და პარლამენტს მისი დაჩქარებით განხილვას სთხოვა.
10 ივლისს ჩატარებულ საკომიტეტო მოსმენაზე კანონპროექტი გააკრიტიკეს როგორც ოპოზიციური პარტიების წარმომადგენლებმა, ისე ტელეკომუნიკაციების სფეროს წარმომადგენლებმაც.
დახურულ კარს მიღმა რამდენიმედღიანი მოლაპარაკებებისა და საკომიტეტო მოსმენის 4-ჯერ გადადების შემდეგ კომისიის თავმჯდომარე კახა ბექაურმა თქვა, რომ ის ბიზნესთან შეთანხმდა და მარეგულირებლის გადაწყვეტილებებზე სასამართლო კონტროლის ნაწილი კანონპროექტში უფრო მეტად დაზუსტდება, თუმცა კანონპროექტის საბოლოო ვერსია არცერთ დეპუტატს არ უნახავს.
აქედან გამომდინარე, ევროპული საქართველოს დეპუტატმა, გიგა ბოკერიამ კახა ბექაურს ჰკითხა, რა შემთხვევაში არ მიმართავს მარეგულირებელი სასამართლოს, როცა ბიზნესზე სანქციების დაკისრებას გადაწყვეტს, რაზეც პასუხი არ მიუღია.
გიგა ბოკერია: რა აზრის ხართ სასამართლოზე? დადებითის, უარყოფითის? რას ფიქრობთ? ნორმალური სასამართლო გვაქვს, ნდობა გაქვთ ჩვენი სასამართლოსი, როგორც მოქალაქეს? კი. ძალიან კარგი. ამხელა ვნებათაღელვისა და რისკებისთვის, რომელიც, თქვენი აღქმით, ბიზნესმა არასწორად ჩათვალა, რომ პრობლემაა. რატომ გინდათ, რომ ამ სასამართლოს, რომელსაც ენდობით, გვერდი აუაროთ იმ სანქცირებისას, რომელსაც თქვენ ბიზნესს უწესებთ?
კახა ბექაური: როგორც ჩანს, არ მისმენდით. იმიტომ, რომ შეთანხმებული რედაქციით და ვერსიით სასამართლო მექანიზმის ის ვერსიაა წარმოდგენილი, რომელსაც თქვენ ბრძანებთ. დღეს არსებული ლიცენზიების შესახებ არსებულ კანონში მექანიზმი რაც არის, რომ კომისიამ უნდა მიმართოს სასამართლოს და სასამართლო ნიშნავს დროებით მმართველს. მხოლოდ ერთზე არ იმოქმედებს ასე.
გიგა ბოკერია: ანუ, მისმენია. თქვენ არ მისმენდით კითხვისას, როგორც ჩანს. ძალიან კარგია, სადაც შეცვალეთ და სასამართლოში წახვალთ, მაგრამ სადაც არ მიდიხართ სასამართლოში, იქ რატომ არ მიდიხართ?
კახა ბექაური: ბატონო გიგა, ამაზეც არ გისმენიათ იმიტომ, რომ თქვენ თქვით, რომ ბიზნესთან შეთანხმება რატომ არ გინდათო და ამაზე ბიზნესი დაგვთანხმდა, რომ ეს მისაღებია მათთვის.
გიგა ბოკერია: გასაგებია, მე არ დაგთანხმებივართ ჯერ და ჩემი კოლეგები ქართული ოცნებიდან. ამიტომ გეკითხებით, სასამართლოს თუ ენდობით იმ ნაწილში, სადაც არ შეუთანხმდით ბიზნესს, იქ რატომ არ ენდობით ბიზნესს?
კახა ბექაური: ვენდობი-თქო, გითხარით. იქ ვტოვებთ სხვა მექანიზმს, რომელიც ასევე სასამართლოს სრულყოფილი კონტროლის მექანიზმია.
გიგა ბოკერია: გაგება მინდა, მოგება კი არ მინდა ამ პინგ-პონგის, ეგ ძალიან ადვილია. გაგება მინდა მართლა. ანუ რჩება თუ არა რაიმე ტიპის რეგულირება და ჩარევა კერძო ბიზნესში თქვენი მხრიდან იმ კანონპროექტით, რომელიც თვალით არ გვინახავს და ვნახავთ, იმედი მაქვს, სადაც სასამართლოში წასვლა არ მოგიწევთ და ისე დააკისრებთ სანქციას ნებისმიერ ბიზნესს.
კახა ბექაური: არა, ბატონო გიგა.
გიგა ბოკერია: ანუ, ყველა შემთხვევაში კომისია მიდის სასამართლოში, ყველა შემთხვევაში?
კახა ბექაური: კომისია არ მიდის სასამართლოში. მეორე შემთხვევაში კომისია საჩივრდება სასამართლოში.
გიგა ბოკერია: ვაიმე, დიდი მადლობა და თქვენ რატომ არ მიდიხართ სასამართლოში? იმ სხვა შემთხვევებში ხომ თქვით, რომ უნდა წახვიდეთ სასამართლოში და უნდა იმსჯელოს სასამართლომ? დღეს რა რეჟიმიც გვქონდა, ნებისმიერი სანქციის შემთხვევაში, სასამართლოში უნდა წასულიყავით თქვენ, ახლა ამას ცვლით ყველაფერზე, ოღონდ, ამბობთ, რომ რაღაც ნაწილში უკან დავაბრუნეთო, მაგრამ რაღაც ნაწილში დატოვეთ, ანუ თქვენ სანქციას დაადებთ ან უარესს უზამთ და მერე კომპანია უნდა წავიდეს სასამართლოში. რატომ?
კომუნიკაციების მარეგულირებელი კომისიის ინციატივის მიხედვით, კომუნიკაციების კომისიას მიენიჭება უფლებამოსილება, ხარვეზის აღმოჩენის შემთხვევაში, ტელეკომუნიკაციების სფეროში მომუშავე კომპანიებში ორი წლით სპეციალური მმართველი დანიშნოს, რომელსაც განუსაზღვრელი ძალაუფლება ექნება.
ინიციატივის შესახებ ვრცლად წაიკითხეთ აქ.
