ეკონომიკა

ისტორიული ანტირეკორდი - წლის მეორე კვარტალში აშშ-ს ეკონომიკა 9.5%-ით შემცირდა

0 კომენტარი
ფოტო: Flickr

შარშანდელ ანალოგიურ პერიოდთან შედარებით მიმდინარე წლის მეორე კვარტალში აშშ-ს ეკონომიკა 9.5%-ით შემცირდა, თუმცა კლება გაცილებით უფრო დიდია ამერიკული მეთოდოლოგიის გათვალისწინებით. 

აშშ-ს სტატისტიკის ბიურო ყოველკვარტალური ეკონომიკური ზრდის მაჩვენებლის ექსტრაპოლირებას მთელ წელზე ახდენს, ამ კალკულაციით აშშ-ის ეკონომიკის კლება 32.9%-ს შეადგენს. ამგვარი სტატისტიკის წარმოების ისტორიაში 1947 წლიდან ეს ყველაზე მასშტაბური კლებაა. 

წინა ანტირეკორდი 1958 წელს დაფიქსირდა, მაშინ ეკონომიკის მოცულობა 10%-ით შემცირდა. ფაქტობრივ გამოსახვაში ნომინალურად ამერიკის ეკონომიკა ნახევარი ტრილიონი დოლარით შემცირდა, თუმცა, თუ კლების ამ მაჩვენებელს მთელ წელზე გავავრცელებთ, კლება 2 ტრილიონ დოლარს აღემატება. 

ეკონომიკის ზომის ამგვარი შემცირება ძირითადად აშშ-ს ფედერალური და საშტატო ხელისუფლების მიერ მიღებული ამკრძალავი ზომებით არის განპირობებული, რომელიც ახალი კორონავირუსის გავრცელების თავიდან არიდების მიზნით იქნა მიღებული. 

თვითიზოლაციის რეჟიმი ქვეყანაში მარტი-აპრილის პერიოდში ამოქმედდა, თუმცა ამ რეჟიმიდან გამოსვლის დროს უშუალოდ საშტატო ხელისუფლება და ადგილობრივი თვითმმართველობები ადგენდნენ. ამკრძალავი ზომების შემსუბუქება ქვეყანაში მაისი-ივნისის პერიოდში დაიწყო, ამიტომაც მესამე კვარტალში ეკონომისტები მშპ-ს 4-4,5%-იან ზრდას პროგნოზირებენ. 

ისტორიულმა კლებამ საბოლოდ დაადასტურა, რომ აშშ-ს ეკონომიკა ამ დროისთვის რეცესიის ფაზაშია, რადგანაც წლის პირველ კვარტალში მშპ-ს კლებამ 5% შეადგინა. ეკონომიკური რეცესიის ტექნიკური განმარტება მიყოლებით ორი ფინანსური კვარტლის განმავლობაში მპშ-ს 2%-ზე ნაკლები ტემპით ზრდას გულისხმობს.

წლის პირველ ნახევარში დაფიქსირებულმა კლებამ ბოლო ხუთი წლის ეკონომიკური ზრდა სრულად გაანულა და აშშ-ს ეკონომიკა ფაქტობრივად 2015 წლის მოცულობას დაუბრუნდა.

მკვეთრად დაეცა მშპ-ს თითქმის ყველა ძირითადი კომპონენტი ფედერალური მთავრობის ხარჯვის მაჩვენებლის გამოკლებით. ეს მაჩვენებელი 14.7%-ით გაიზარდა. აშშ-ს კონგრესმა უკვე მიიღო ორი ტრილიონი დოლარის მოცულობის ანტიკრიზისული გეგმა, თუმცა ამ დროისთვის საკანონმდებლო ორგანოებში დამატებით ერთი ტრილიონი დოლარის მოცულობის გეგმაზე მსჯელობენ.

ახალი ვიდეო მეტი ვიდეო

ყოფილი ცოლის ცემისთვის ბათუმში 29 წლის კაცი დააკავეს (ვიდეო)

კომენტარები