დაავადებათა კონტროლის ეროვნული ცენტრის ხელმძღვანელის, ამირან გამყრელიძის ინფორმაციით, კორონავირუსის ცხრა ახალი შემთხვევიდან, ერთი სოფელ გაჩიანის კლასტერს მიეკუთვნება, სამი უკვე დადასტურებულ შემთხვევასთან კონტაქტია, ორი - სამედიცინო პერსონალი, ორი კი იმპორტირებული შემთხვევაა, რომელთაგან ერთი - სატვირთო ავტომანქანის მძღოლია.
გამყრელიძის თქმით, ერთი შემთხვევის ეპიდკვლევა ამ დრომდე მიმდინარეობს. მისივე თქმით, დღეს თუ არა ხვალ ამ შემთხვევის წყარო ცნობილი იქნება.
9 აგვისტოს მონაცემებით, ქვეყანაში ახალი კორონავირუსით ინფიცირების 1 225 შემთხვევაა დადასტურებული, მათგან 1000 პაციენტი გამოჯანმრთელდა, 17 კი გარდაიცვალა. კარანტინის რეჟიმში 7 068 მოქალაქე იმყოფება, ხოლო სტაციონარში მეთვალყურეობის ქვეშ – 250.
დაავადებათა კონტროლის ეროვნული ცენტრის ცნობით, ქვეყანაში ახალი კორონავირუსის 208 აქტიური შემთხვევაა.