აჭარაში ფინანსთა სამინისტროს შემოსავლების სამსახურის სამ თანამშრომელს კორონავირუსი დაუდასტურდა.
როგორც უწყების მიერ გავრცელებულ განცხადებაში ვკითხულობთ, კორონავირუსზე გეგმური ტესტირება "ბათუმის გაფორმების ეკონომიკურ ზონაში" 185 მებაჟე-ოფიცერსა და სარფის საბაჟო-გამშვები პუნქტის 99 მებაჟე-ოფიცერს ჩაუტარდა. გამოკვლეული ტესტებიდან 3 დადებითია.
ფინანსთა სამინისტროს შემოსავლების სამსახურის ცნობით, ტესტირება რისკ ჯგუფებში მყოფ ყველა თანამშრომელს ჩაუტარდა. მათივე ინფორმაციით, ინფიცირებულთა ჯანმრთელობის მდგომარეობა დამაკმაყოფილებელია.
დღეს, 8 სექტემბერს, საქართველოში Covid-19-ის 45 ახალი შემთხვევა დადასტურდა, რაც ქვეყნისთვის რეკორდული მაჩვენებელია. გამოჯანმრთელდა კიდევ 6 ადამიანი. 45 ახალი შემთხვევიდან 23 აჭარას უკავშირდება.
სულ ქვეყანაში დადასტურებულია 1729 შემთხვევა, გამოჯანმრთელდა 1321 პაციენტი.
