ეროვნულ-დემოკრატიული ინსტიტუტის (NDI) კვლევის მიხედვით, გამოკითხული მოსახლეობის 56% ფიქრობს, რომ ამჟამად ჯანდაცვის სისტემის წინაშე მდგარი ყველაზე დიდი პრობლემა წამლების საფასურია. გამოკითხულთა 29%-ის აზრით კი - სამედიცინო მომსახურებისა და ექიმთან ვიზიტის საფასური.
გამოკითხულთა 17% ყველაზე დიდ პრობლემად საავადმყოფოებისა და სამედიცინო მომსახურების ხელმისაწვდომობას აღიქვამს. 15%-ის აზრით - ჯანდაცვის სისტემის მთავარი პრობლემა ექიმებისა და სამედიცინო პერსონალის პროფესიონალიზმის ნაკლებობაა.
გამოკითხულთა 12%-ის აზრით, ჯანდაცვის სისტემაში პრობლემები არ არის.
კვლევაში 2 045 ადამიანი სატელეფონო გამოკითხვების მეთოდით გამოიკითხა. რესპონდენტები შემთხვევით ნომერზე დარეკვის პრინციპით შეირჩნენ. საველე სამუშაოები 6-11 აგვისტოს ჩატარდა. კვლევის საშუალო ცდომილება +/- 1.3%-ია.