ბათუმის რესპუბლიკური საავადმყოფოს დირექტორს, სოლომონ ფუტკარაძეს ახალი კორონავირუსი დაუდასტურდა. ინფორმაცია ტაბულას კლინიკაში დაუდასტურეს. მათი განმარტებით, ფუტკარაძე მერვე დღეა, რაც ბინაზე მკურნალობს.
გასულ დღე-ღამეში საქართველოში კორონავირუსით ინფიცირების 265 ახალი შემთხვევა აღირიცხა, რაც რეკორდული მაჩვენებელია. შემთხვევების დიდი წილი კვლავ აჭარის ავტონომიურ რესპუბლიკაზე მოდის, სადაც აღირიცხა 165 ახალი შემთხვევა, თბილისში კი – 43. დღე-ღამის განმავლობაში ვირუსისგან 54 ადამიანი გამოჯანმრთელდა.
ბოლო პერიოდში ქვეყანაში ახალი კორონავირუსის შემთხვევების გამოვლენა მკვეთრად გაიზარდა. უწყებათაშორისი საკოორდინაციო საბჭოს გადაწყვეტილებით, საქართველოს ყველა დიდ ქალაქში სასწავლო პროცესი 1-ელ ოქტომბრამდე გადაიდო. აკრძალულია 200 ადამიანზე მეტის შეკრება, როგორც დახურულ, ისე ღია სივრცეებშიც. ასევე აკრძალულია ქორწილებისა და ქელეხების გადახდა.
სულ საქართველოში ახალი კორონავირუსის 4 664 შემთხვევაა დადასტურებული, მათგან 1 759 პაციენტი გამოჯანმრთელდა, 26 კი გარდაიცვალა.