ცენტრალური საარჩევნო კომისია აქვეყნებს განცხადებას, რომლის მიხედვითაც, სიმართლეს არ შეესაბამება გავრცელებული ინფორმაცია, რომ თანამდებობა 7-მა თანამშრომელმა დატოვა.
"სოციალურ ქსელებში ვრცელდება ინფორმაცია, რომ ცენტრალური საარჩევნო კომისიის 7-მა წევრმა დატოვა დაკავებული პოზიცია. აღნიშნული არ შეესაბამება სიმართლეს.
მივმართავთ საარჩევნო პროცესებში ჩართულ მხარეებს - თავი აარიდონ დეზინფორმაციის გავრცელებას და არ შეიყვანონ საზოგადოება შეცდომაში ცრუ ინფორმაციის გავრცელებით." - წერია განცხადებაში.
დღეს, 6 ნოემბერს, თანამდებობა დატოვა ცესკოს საარჩევნო კომისიებთან ურთიერთობის დეპარტამენტის უფროსმა სპეციალისტმა, ივანე ბურდულმა. როგორც ის განმარტავს, სამსახურიდან წასვლის მიზეზი ცესკოს მიერ 2020 წლის საპარლამენტო არჩევნების გაყალბებაა.