თბილისის საქალაქო სასამართლოში მოძრაობა სირცხვილიას ორი აქტივისტის, ნოდარ რუხაძისა და გიორგი მჟავანაძის პროცესი დასრულდა.
მოსამართლემ გიორგი მჟავანაძეს 3-დღიანი პატიმრობა, ხოლო ნოდარ რუხაძეს 1500-ლარიანი ჯარიმა დააკისრა.
9 ნოემბერს, გიორგი მჟავანაძის დაკავებიდან ცოტა ხანში, მისმა ადვოკატმა ედუარდ მარიკაშვილმა დაწერა, რომ პოლიციელებმა მჟავანაძეზე პოლიციის ეზოში ფიზიკურად იძალადეს. მისივე ინფორმაციით, აქტივისტის ფიზიკური შეურაცხყოფის მიყენების შესახებ სახელმწიფო ინსპექტორის სამსახურმა გამოძიება დაიწყო.
სირცხვილიას 3 აქტივისტი 9 ნოემბერს პარლამენტის წინ აქციაზე დააკავეს. პოლიციამ მათ აქციაზე შესატანი შეშა წაართვა - მათი მტკიცებით, შეშა "შეიძლება, გამოყენებულ იქნეს, როგორც ძალადობის საგანი." მათ გამოძიება წვრილმან ხულიგნობასა და პოლიციისადმი დაუმორჩილებლობას ედავება. დაკავებულ აქტივისტ ლექსო მაჭავარიანს სასამართლომ გუშინ, 10 ნოემბერს, 1000-ლარიანი ჯარიმა დააკისრა.