ჩინეთში იმ ქალბატონის ვინაობა დაასახელეს, ვინც შაბათს კოსმოსური პროექტის ფარგლებში კოსმოსში გაემგზავრება და ამგვარად ქვეყნის პირველი მდედრობითი სქესის ასტრონავტი გახდება.
ჩინეთის საინფორმაციო სააგენტოს, სინხუას ცნობით, ქვეყნის სამხედრო-საჰაერო ძალების 33 წლის პილოტი ლიუ იანგი ორ მამაკაც ასტრონავტთან ერთად კოსმოსური ხომალდის Shenzhou 9 ბორტზე ავა.
ჩინეთი აღნიშნულ პროექტს მუდმივი კოსმოსური სადგურის შექმნის მიზნით ახორციელებს.
”პირველივე დღიდანვე მეუბნებოდნენ, რომ არაფრით განვსხვავდებოდი მამრობითი სქესის ასტრონავტებისგან. მჯერა, რომ, თუ რაღაცისკენ ჯიუტად ისწრაფვი, წინ წარმატება გელის”. - განაცხადა ლიუ იანგმა ერთ-ერთ ტელეკომპანიასთან საუბარში.
გამოცემის ცნობით, ჩინეთის პირველი ასტრონავტი ქალბატონი ქვეყნის სახალხო-განმათავისუფლებელ არმიაში 1997 წლიდან მსახურობს. კოსმოსურ პროგრამაში მონაწილეობის მისაღებად იგი 2010 წელს შეარჩიეს.
2012 წლის აპრილის მონაცემებით, 1960-იანი წლებიდან მოყოლებული დღემდე კოსმოსში ფეხი 54 ასტრონავტ ქალს დაუდგამს.