პატიმართა წამების ფაქტებთან დაკავშირებით სასჯელაღსრულების დეპარტამენტის ათი თანამშრომელი დააკავეს. ამის შესახებ განცხადება მთავარმა პროკურორმა, მურთაზ ზოდელავამ გააკეთა.
გამოძიების ფარგლებში დაკავებული არიან: დეპარტამენტის თავმჯდომარის მოადგილე გაგა მკურნალიძე; გლდანის მერვე საპყრობილეს დირექტორი დავით ხუჭუა; დირექტორის მოადგილე ვიქტორ ყაჭეიშვილი; საპყრობილის უსაფრთხოების განყოფილების უფროსი ლევან ფურცხვანიძე; მერვე საპყრობილის რეჟიმის უფროსი ინსპექტორი გიორგი კვარაცხელია; მერვე საპყრობილის რეჟიმის განყოფილების უფროსი ოლეგ ფაცაცია; კონტროლის ინსპექტორი მანუჩარ ლომთაძე; ოპერატიული მორიგე გელა ცომაია; კონტროლიორი ლევან ფხალაძე; უსაფრთხოების განყოფილების ინსპექტორი ბორის ფარულავა.
მურთაზ ზოდელავას განცხადებით, პატიმართა წამების ფაქტებთან დაკავშირებით 11-ე პიროვნებას, მორიგე-ინსპექტორ ვლადიმერ ბედუკაძეს დაუსწრებლად წარედგინა ბრალი. პროკურორის განცხადებით, ათი საჯარო მოხელე დამამცირებელი ან არაადამიანური მოპყრობის ბრალდებით არის დაკავებული.
აგრეთვე გავრცელდა ინფორმაცია, რომ გლდანის #8 საპყრობილის ოფიცერი დავით აკობია, რომელმაც პატიმართა წამების კადრები გადაიღო, 19 სექტემბერს გამთენიისას დააკავეს. იგი ამ დროისთვის შსს-ს მთავარი სამმართველოს წინასწარი დაკავების იზოლატორში იმყოფება. შსს-ს მთავარ სამმართველოში დაკითხვაზე იმყოფებოდა პატიმართა ცემის ფაქტებთან დაკავშირებული კიდევ ერთი პირი, თამაზ ელიზბარაშვილიც.