ქართულ მხარეს საფრანგეთის უწყებებთან თანამშრომლობის დროს, ინფორმაციის კონფიდენციალურობაზე ვალდებულება არ აუღია. ამის შესახებ დღევანდელ ბრიფინგზე იუსტიციის მინისტრის მოადგილემ, თინა ბურჯალიანმა განაცხადა.
,,ეს სამართლებრივი დახმარების თხოვნა, რომელიც საქართველოს პროკურატურამ გაუგზავნა საფრანგეთის სასამართლოს, სრულად დაკმაყოფილდა გუშინ 25 სექტემბერს. იქიდან გამომდინარე, რომ საქმე ეხება უსაფრთხოების მნიშვნელოვან საკითხებს და ასევე საჯარო პირების შესაძლო დანაშაულებრივ ქმედებებს, საქართველოს სამართალდამცავ ორგანოებს არც ერთ ეტაპზე არ აუღია ვალდებულება საფრანგეთის შესაბამისი სტრუქტურების წინაშე ინფორმაციის კონფიდენციალურობასთან დაკავშირებით.’’-განაცხადა თინა ბურჯალიანმა.
მისივე თქმით, ქართველი სამართალდამცავები ფრანგ კოლეგებთან საფრანგეთის საგარეო უწყების გარეშე თანამშრომლობდნენ.
,,გაკვირვებული ვარ საფრანგეთის საგარეო საქმეთა სამინისტროს განცხადებით. საქმე იმაშია, რომ დიპლომატიური სტრუქტურები საქართველოსა და საფრანგეთის ამ თანამშრომლობაში ჩართული არ ყოფილან. თანამშრომლობა და ურთიერთდახმარება განხორციელდა ევროპული კონვენციის თანახმად. კერძოდ, ამ კონვენციის მე-13 მუხლი პირდაპირ ითვალისწინებს ორი ქვეყნის კომპეტენტური უწყებების პირდაპირ კომუნიკაციას და თანამშრომლობას.’’-აღნიშნა თინა ბურჯალიანმა.
შეგახსენებთ, საფრანგეთის საგარეო საქმეთა სამინისტრომ საქართველოს ხელისუფლების მიერ ჟანდარმერიის მიწოდებული დოკუმენტაციის გამოქვეყნების ფაქტთან დაკავშირებით განცხადება გააკეთა. საფრანგეთის საგარეო უწყების პრესსპიკერის მოადგილის ვენსან ფლორეანის განცხადებაში ნათქვამია, რომ ფრანგული მხარე გაოცებულია საქართველოს მთავრობის მიერ საიდუმლო მასალების გამოქვეყნებით.
საფრანგეთის საგარეო უწყება აღნიშნავს, რომ საფრანგეთის ხელისუფლებას აღნიშნული ინფორმაციის გამოქვეყნების ნებართვა არ გაუცია.
