Youtube-ზე გავრცელებულ აუდიოჩანაწერებს, კოალიცია ქართული ოცნების ლიდერი ბიძინა ივანიშვილი გამოეხმაურა. მან ჩანაწერებს ფაბრიკაცია უწოდა.
,,ხელისუფლება ყველანაირად ცდილობს, რომ გადაფაროს ის კადრები, რომლებიც ციხეებში არსებულ რეალობას ასახავდა. ხელისუფლება ამ მორიგი ფაბრიკაციებით ცდილობს, ხალხს ეს ამბავი დაავიწყოს და მისი გადაფარვა მოახდინოს, თუმცა ამას ვერ შეძლებს, ეს არის იაფფასიანი ფაბრიკაცია და არასერიოზულია მასზე ლაპარაკი.’’-განაცხადა ბიძინა ივანიშვილმა.
ივანიშვილმა აღნიშნა, რომ დაცვის თანამშრომლებისთვის კოალიციის წევრების საუბრების ჩაწერის დავალება არასდროს მიუცია და მისი ,,დაცვის წევრი დააშინეს.’’
შეგახსენებთ, Youtube-ზე გავრცელდა აუდიოჩანაწერები, სადაც ასახულია კოალიცია ქართული ოცნების წევრების საუბრები.
ჩანაწერები ბესო სურმავამ გაავრცელა, რომელიც ამბობს, რომ ბიძინა ივანიშვილის პირადი დაცვის წევრი იყო. მისივე თქმით, ქართული ოცნების წევრების საუბრების მოსმენა და ჩაწერა უსაფრთხოების სამსახურს ბიძინა ივანიშვილისგან ჰქონდა დავალებული.