სტუდია GNS-ის ხელმძღვანელი ნანა ლეჟავა აცხადებს, რომ მერიის მიერ გავრცელებულ აუდიოჩანაწერთან დაკავშირებით, სასამართლოსთვის მიმართვას აპირებს.
მისი თქმით, ჩანაწერში მისი გვარის მოხსენიება, სტუდია GNS-ის მიერ მომზადებულ რეპორტაჟს უკავშირდება, რომელიც თბილსის მერის ლას-ვეგასში ვიზიტებს ეხებოდა.
"ეტყობა, ეს ის ბუმერანგია, თავად მერის სიტყვებით რომ ვთქვათ, რომელიც მოგვიბრუნდა იმასთან დაკავშირებით, რომ ჩვენ მათთვის არასასურველი რეპორტაჟი გავაკეთეთ. "ჰერმესის" თემით აქამდე ნამდვილად არ დავინტერესებულვართ, მაგრამ მერს პირობას ვაძლევთ, რომ თუ საინტერესო რამ ჩაგვივარდება ხელში, აუცილებლად გავაკეთებთ. ეტყობა, ეს არის გარკვეული პრევენცია, მათ იციან სად აქვთ სუსტი ადგილები და წინასწარ თავს იცავენ", - აცხადებს ნანა ლეჟავა.
შეგახსენებთ, მერიის პრესსპიკერმა ბაჩო დოლიძემ სპეციალური განცხადება გააკეთა და აღნიშნა, რომ შპს ჰერმესთან დაკავშირებით მოსალოდნელია პროვოკაცია. როგორც ბაჩო დოლიძე აცხადებს, მოსალოდნელი პროვოკაციის შესახებ მერიას შპს ჰერმესის ყოფილმა თანამშრომელმა მიაწოდა ინფორმაცია და აუდიოჩანაწერი.