სამართალდამცავების მიერ გუშინ დაკავებულ საქართველოს ჭიდაობის ფედერაციის პრეზიდენტს კახა გეწაძეს, ჭიდაობის ეროვნული ფედერაცია და მოჭიდავეთა გარკვეული ნაწილი თავდებში ჩაუდგება. ამის შესახებ, ფედერაციის გენერალურმა მდივანმა, მალხაზ ჯორბენაძემ დღეს განაცხადა.
"ჭიდაობის ეროვნული ფედერაცია და პირადად მეც თავდებში ვუდგებით ბატონ კახა გეწაძეს. დანამდვილებით ვიცი, რომ ის აქამდეც თანამშრომლობდა გამოძიებასთან და აწიც ითანამშრომლებს. არ არის აუცილებელი მისთვის აღმკვეთი ღონისძიების მიცემა და ასე ვთქვათ ციხეში ჩასმა. იგი არ არის ისეთი ადამიანი, რომელიც გაექცევა გამოძიებას. კიდევ ერთხელ ვიმეორებ, რომ ჭიდაობის ფედერაცია თავდებში ჩაუდგება ბატონ კახა გეწაძეს, სანაცვლოდ კი ვითხოვთ მის გათავისუფლებას", - განაცხადა ჯორბენაძემ.
შეგახსენებთ, რომ იმერეთის საოლქო პროკურატურაში გეწაძის წინააღმდეგ საქმე სამი მუხლით არის აღძრული: სისხლის სამართლის კოდექსის 118-ე მუხლის პირველი ნაწილით, რომელიც ჯანმრთელობის განზრახ მსუბუქ დაზიანებას გულისხმობს, 239-ე მუხლის მესამე ნაწილით, რომელიც ცეცხლსასროლი იარაღით ჩადენილ ხულიგნობას გულისხმობს და 184-ე მუხლის პირველი ნაწილით.
