თავდაცვის ყოფილი მინისტრის, ირაკლი ოქრუაშვილის სასამართლო პროცესი, საქალაქო სასამართლოში დღეს გაიმართება, პროცესს ბრალდებულიც დაესწრება.
''დავაყენებთ შუამდგომლობას აღმკვეთი ღონისძიების, საქმეზე დამატებითი მტკიცებულებების დართვისა და მოწმეების დაკითხვის შესახებ", - აღნიშნა ოქრუაშვილის ადვოკატმა, მამუკა ჭაბაშვილმა.
პროცესის დასაწყისში, რამდენიმე წუთით ფოტო და ვიდეოგადაღება იქნება დაშვებული.
შეგახსენებთ, ირაკლი ოქრუაშვილის სასამართლო პროცესი 20 ნოემბერს იყო დანიშნული, თუმცა, ბრალდებულების ადვოკატების შუამდგომლობის საფუძველზე, სხდომა 3 დეკემბრისთვის გადადო.
ირაკლი ოქრუაშვილთან ერთად შეიარაღებული ფორმირებების მომზადებაში ბრალდებულია კიდევ რამდენიმე პირი, თავდაცვის ყოფილ მინისტრს ბრალი წარდგენილი აქვს სისხლის სამართლის კოდექსის 223-ე მუხლის პირველი ნაწილით, რაც უკანონო შეიარაღებული ფორმირებების შექმნასა და მეთაურობას გულისხმობს.
ირაკლი ოქრუაშვილი საქართველოში 20 ნოემბერს დაბრუნდა და საზღვრის გადმოკვეთისთანავე დააკავეს.