საქართველოს პრეზიდენტი მიხეილ სააკაშვილი ებრაელ ხალხს ხანუქას დღესასწაულს ულოცავს. ამის შესახებ პრეზიდენტის ადმინისტრაცია იუწყება.
"მთელ ებრაელ ხალხს და საქართველოს ებრაელებს სულითა და გულით გილოცავთ ხანუქას ბრწყინვალე დღესასწაულს. მინდა გისურვოთ ამ მტკიცე რწმენით იღვაწოთ ჩვენი საერთო სამშობლოს კეთილდღეობისა და განვითარებისთვის. ამ რწმენით ცხოვრობდნენ და დღესაც იღვწიან ქართველი ებრაელები, რომელთა წვლილი საქართველოში კულტურის განვითარების საქმეში და სახელმწიფოს აღმშენებლობაში, განსაკუთრებულია. მშვიდობას, კეთილდღეობას და წარმატებებს გისურვებთ თქვენ და თქვენ ოჯახებს", - ნათქვამია საქართველოს პრეზიდენტის განცხადებაში.
ხანუქას დღესასწაულს ებრაელი ხალხი 8 დღისა და ღამის განმავლობაში აღნიშნავს. დღესასწაული ნოემბრის ბოლოს ან დეკემბრის თვეში აღინიშნება და ბერძნულ-სირიულ არმიაზე ებრაელთა მცირერიცხოვანი ჯარის გამარჯვებას ეძღვნება.