„მე, როგორც ყოფილი პროკურორი, პატივს ვცემ ყველა გამოძიებას, თუმცა ეს არ არის ჩვეულებრივი გამოძიება, ეს არის პოლიტიკურად მოტივირებული პროცესი, ბატონი ბიძინა ივანიშვილის დაკვეთა თავისი პარტიის პოლიტიკური ოპონენტების წინააღმდეგ, ამიტომ პოლიტიკურ დევნას ვპასუხობ კონკრეტული საჯაროობით“, - განაცხადა საპარლამენტო უმცირესობის წევრმა დავით საყვარელიძემ და აღნიშნა, რომ მას არ სურს ხელი შეუწყოს დღევანდელ ხელისუფლებას პოლიტიკური დევნისა და სიბინძურეში მათი გასვრის პროცესში, ამიტომ ყველა კითხვას საჯაროდ უპასუხებს.
დავით საყვარელიძე ფინანსური პოლიციის საგამოძიებო დეპარტამენტში დღეს, 11 დეკემბერს დაიბარეს. ფინანსთა სამინისტრომ ამასთან დაკავშირებით განცხადება გაავრცელა, სადაც ნათქვამია, რომ საქმე რიყის მიმდებარე ტერიტორიის გასხვისებისა და გამოსყიდვის ფაქტებს ეხება. დავით საყვარელიძე და სხვა მაღალჩინოსნები, მათ შორის, იმერეთის ყოფილი გუბერნატორი ლაშა მაქაცარია, სწორედ ამ საქმესთან დაკავშირებით დაიბარეს საგამოძიებო უწყებაში. 2006 წელს ისინი თბილისის მერიის მიწის მართვისა და განკარგვის კომისიის წევრები იყვნენ.