პარლამენტის თავმჯდომარე დავით უსუფაშვილი ერთიანი ნაციონალური მოძრაობის ოფისთან მომხდარ ინციდენტს პარლამენტის ტრიბუნიდან გამოეხმაურა და სამართალდამცავ ორგანოებს რეაგირების მოთხოვნით მიმართა.
უსუფაშვილი სამართლდამცავებს მოუწოდებს , დროულად დადგინდეს, ''რა მოხდა მაშინ, როცა პრეზიდენტი ნაციონალური მოძრაობის დეპუტატებს ხვდებოდა''.
მისი თქმით, ამ ფაქტის შესწავლა პარლამენტის ღირსების საქმეა. პარლამენტის თავმჯდომარის განმარტებით, ყველა მოქალაქეს აქვს აზრის გამოხატვის და პოზიციის დაფიქსირების უფლება, ''მაგრამ, დაუშვებელია პარლამენტის წევრთან ფიზიკური შეხება''.
"თუ ეს ხალხი ჩვენ არ დავიცავით დღეს, ამ დღეში აღმოვჩნდებით ჩვენ ყველანი შემდგომში", - განაცხადა დავით უსუფაშვილმა.
შეგახსენებთ, ქუთაისში პრეზიდენტის შეხვედრამ ერთიანი ნაციონალური მოძრაობის წარმომადგენლებთან, საპროტესტო აქციების ფონზე ჩაიარა. როგორც საპარლამენტო უმცირესობის წევრებმა ტაბულას განუცხადეს, შეკრებილი ადამიანები მათ შეურაცხყოფას აყენებდნენ და ქვებს ესროდნენ.