ქართული ოცნების დეპუტატმა, სოსო ჯაჭვლიანმა, საზოგადოებრივ მაუწყებელზე, გადაცემა "აქცენტებში" პირობა დადო, რომ ამიერიდან ტერმინ "მესაჯდომეს" აღარ გამოიყენებს და მათ მხოლოდ უმცირესობის სახელით მოიხსენიებს. საკუთრივ ტერმინი "მესაჯდომე" რამდენიმე თვის წინ ჰომოსექსუალთა აღსანიშნავად თავად ჯაჭვლიანმა გამოიგონა. "მესაჯდომეებს დღეიდან ვუწოდებ უმცირესობას", განაცხადა მან პირდაპირ ეთერში. ჯაჭვლიანმა ასევე აღნიშნა, რომ ამიერიდან, როგორც პარლამენტის წევრი, აპირებს მესაჯდომეთა უფლებები ისე დაიცვას, რომ "მათ რაც შეიძლება მეტი სიამოვნება მიიღონ ცხოვრებისგან".
ფილმის "მაიტა ნასოსი" რეჟისორის და მთავარი როლის შემსრულებლის თქმით, მთელი ცხოვრების მანძილზე "მესაჯდომეები" მის უფლებებს ლახავდნენ. ჯაჭვლიანს არ დაუზუსტებია, კონკრეტულად რა ფორმით არღვევდნენ მის უფლებებს "მესაჯდომეები", თუმცა აღშფოთება გამოთქვა იმასთან დაკავშირებით, რომ მედია უფრო მეტ ყურადღებას უთმობს "მესაჯდომეებს", ვიდრე ქართველ სპორტსმენებს.
დეპუტატის თქმით, ის არ აპირებს სექსუალური უმცირესობების მიმართ ასავალ-დასავალისთვის მიცემულ ინტერვიუში გაკეთებული განცხადების გამო ბოდიშის მოხდას. მისი თქმით, როდესაც ეს განცხადება გააკეთა, ის ჯერ არ იყო დეპუტატობის კანდიდატი.