პარლამენტის თავმჯდომარე დავით უსუფაშვილი, გუშინ ტელეკომპანია მაესტროს ეთერში მოხმდარ ინციდენტს გამოეხმაურა. მისი თქმით, მომხდარს არანაირი გამართლება არ აქვს.
''უფრო მკაფიო რომ ვიყო, გეტყვით, მე საბურთალოს ამომრჩეველი ვარ და პარლამენტის ამ ორი წევრიდან თუკი რომელიმე თავის თავს შემომთავაზებს, ვერცერთი მათგანი ჩემს ხმას ვერ მიიღებს'', - განაცხადა დავით უსუფაშვილმა.
მისი თქმით, დეპუტატმა ხალხს უკეთესობის განცდა უნდა შეუქმნას და არა პირიქით.
"თუ ხარ პარლამენტის წევრი, უნდა გქონდეს უნარი, მოიქცე სამაგალითოდ იმიტომ, რომ წარმოადგენ პარლამენტში ხალხს და არა გაქვს გაბრაზების უფლება. დღის განმავლობაში იმდენ რამეს მივყავარ იქამდე, რომ შესაძლოა, ჭიქის გატეხვა, ან სხვა რამ მომინდეს, მაშინ სხვა საქმე და სხვა ასპარეზი უნდა მოვნახოთ იმისთვის, რომ ჩვენი ვნებები და ემოციები დავიკმაყოფილოთ. თუ ქვეყანას ემსახურები, კეთილი ინებე და ემოციები დაიოკე", - აღნიშნა უსუფაშვილმა.
შეგახსენებთ, გუშინ, ტელეკომპანია მაესტროს პირდაპირ ეთერში, პარლამენტის დეპუტატები - უმრავლესობის წარმომადგენელი კობა დავითაშვილი და უმცირესობის წარმომადგენელი სერგო რატიანი, ერთმანეთს სიტყვიერად და ფიზიკურად დაუპირისპირდნენ.
დეპუტატმა სერგო რატიანმა, ინციდენტისთვის მაყურებელს მალევე მოუბოდიშა.
"მიუხედავად ზღვარგადასული შეურაცხყოფებისა, მიუხედავად იმისა, რომ გავაფრთხილე ბატონი დავითაშვილი, დამშვიდებულიყო, ვწუხვარ, რომ ეს ინციდენტი მოხდა. ჩვენი ხალხი არ უნდა უყურებდეს პოლიტიკოსების ჩხუბს ეთერში", - განაცხადა რატიანმა.
რაც შეეხება კობა დავითაშვილს, მან განაცხადა, ის ''არც მონანიებას არ აპირებს და არც ბოდიშის მოხდას მკვლელების წინაშე''.