პრემიერმინისტრ ბიძინა ივანიშვილის თქმით, ის თურქეთის პრემიერმინისტრთან შეთანხმდა, რომ აზიზეის მეჩეთი მის ისტორიოლ ადგილზე არ აშენდება. სანაცვლოდ ქართული მხარე ახალ მეჩეთს ააშენებს. სალოცავისთვის ადგილს უკვე ეძებს აჭარის მთავრობა. პრემიერმა ამის შესახებ პარტია ქართული ოცნების ყრილობაზე განაცხადა. ივანიშვილის თქმით, მიღწეულია შეთანხმება ქართული ტაძრების, იშხნისა და ოშკის რესტავრაციის შესახებაც.
"მე და ბატონმა ერდოღანმა მივაღწიეთ შეთანმებას. ერთი-ერთზე შეხვედრის დროს ეს საკითხი მწვავედ დაისვა და მგონი, რომ მოვახერხეთ შეთანხმება. იმაზე, რომ იმ ადგილზე აზიზიეს მეჩეთი არ უნდა აშენდეს, შევთანხმდით. ამავდროულად, ბათუმსა და აჭარაში ჩვენი ქართველი მუსულმანები ძალიან ბევრია, ასევე, ბლომად არიან მუსულმანი ტურისტებიც და არ არის საკმარისი სალოცავი. ეზოში გამოდიან და მეჩეთის ეზოშიც ვერ ეტევიან და ქუჩაში უწევთ ლოცვა ხშირად. 200-ზე მეტი მეჩეთია და არ არის პრობლემა სხვა მეჩეთის აშენების. ადგილს ეძებს აჭარის მთავრობის მეთაური ხაბაძე. უახლოეს დღეებში ადგილს მოვძებნით და აშენდება მეჩეთი. ამას არ სჭირდება არანაირი პოლიტიკური დატვირთვა. ამავდროულად, შეხვედრის დროს ერდოღანმა თვითონ თქვა, რომ ქართველების ჯგუფი, ქართველების ექსპედიცია ექსპერტებთან ერთად დაიშვება ოშკისა და ხახულის რესტავრაციაზე. მე მგონი, ეს წინგადადგმული ნაბიჯია. წარმატებული ვიზიტი გვქონდა და პრაქტიკულად ყველა საკითხში შევთანხდით. წლების განმავლობაში ამ საკითხზე სხვანაირ განცხადებებს აკეთებდა "ნაციონალური მოძრაობა" და ამ საკითხის აჟიტირება ხდებოდა, მაგრამ პირველსავე შეხვედრაზე ცალსახად დარეგულირდა ეს პროცესები", - განაცხადა ივანიშვილმა.
ივანიშვილი თურქეთში პრემიერმინისტრ ერდოღანს შეხვდა, სადაც აღნიშნულ საკითხზეც ისაუბრეს. საქართველოს საგარეო საქმეთა მინისტრის მაია ფანჯიკიძის თქმით, კულტურულ ძეგლებზე საუბრისას, არ იმოქმედებს ნაცვალგების პრინციპი, რადგან ძეგლებს მოვლა სჭირდება, მიუხედავად იმისა, თუ ვის ეკუთვნის ის.
აღსანიშნავია, რომ ქართველი მუსლიმებისთვის მეჩეთის მშენებლობის აქტიური მოწინააღმდეგე, მმართველი კოალიციის ლიდერი და პარლამენტის ვიცესპიკერი, მურმან დუმბაძე გახლდათ. ის იყო ბათუმში მეჩეთის აშენების წინააღმდეგ მიტინგების ორგანიზატორიც. მაშინ მურმან დუმბაძე აცხადებდა:
"სხვა ქვეყნის მიერ საქართველოს სახელმწიფოში საკულტო ნაგებობა ვერ აშენდება; მით უმეტეს, ისტორიის იმ მონაკვეთს არ დავუდგამთ ძეგლს, როცა ბათუმში დამპყრობი სულთანის, აზიზიეს სახელობის მეჩეთი აშენდა. რუსეთმა რომ გვითხრას, ლენინის ძეგლი აღადგინეთო, აღვადგინოთ? ტელეფონის ზარები არ წყდება ჩემთან - მთელი ქალაქის ინტელიგენცია (განსაკუთრებით უნივერსიტეტიდან) გადამჭრელი ზომების მიღებას მთხოვენ. გარწმუნებთ, მოღალატე სააკაშვილს ამის უფლებას არ მივცემთ! აზიზიეს სახელობის ოკუპაციის მეჩეთ-მუზეუმის ხელახალი აშენებით თურქეთის სახელმწიფოს ოსმალური იმპერიის ამბიციებს გავუღვივებთ. ამის დაშვება კი ქართული სახელმწიფოს ნგრევის დაწყებას ნიშნავს".
მურმან დუმბაძე "პროვოკაციაში" თურქეთის კულტურის მინისტრთან ერთად მიხეილ სააკაშვილსაც სდებდა ბრალს:
"ამ კაცს არ სურს ხელისუფლებიდან წასვლა საარჩევნო ბიულეტენების მეშვეობით; მისი მიზანი პანღურით გაგდებაა - მას გაგდებული პრეზიდენტის სახელით სურს ისტორიაში შესვლა, მაგრამ ამას ვერ ეღირსება - რამდენიმე თვეში სააკაშვილი თავის "აზიზიეს მეჩეთიანად" უნდა დასრულდეს საარჩევნო ყუთებთან", - აცხადებდა მურმან დუმბაძე.
ახალი მეჩეთის აშენების შესახებ გადაწყვეტილების გამოცხადების შემდეგ დუმბაძემ განაცხადა, რომ ის მეჩეთის აშენების წინააღმდეგი არასდროს ყოფილა, თუ ეს მეჩეთი ადგილობრივ მუსლიმებს სჭირდებათ.