საქართველოს საგარეო საქმეთა მინისტრი მაია ფანჯიკიძე ამერიკელი კონგრესმენების მიერ სახელმწიფო მდივნისთვის, ჯონ კერისთვის მიწერილ წერილს გამოეხმაურა. მინისტრის თქმით, კანონმდებლებს ზუსტი ინფორმაცია არ მიეწოდებათ და ვინც საქართველოს პოლიტიკური მდგომაროებით რეალურად არის დაინტერესებული, უნდა ჩამოვიდეს და ადგილზე გაეცნოს სიტუაციას.
"ჩვენ ძალიან დიდ პატივს ვცემთ ამერიკელი კონგრესმენების განცხადებას და საერთოდ, ძალიან კარგი ურთიერთობა გვაქვს როგორც კონგრესთან და სენატთან, ასევე სახელმწიფო დეპარტამენტთან. ყველა დიპლომატიური არხით ვაწოდებთ ჩვენ ინფორმაციებს საქართველოში მიმდინარე მოვლენებთან დაკავშირებით. მე ვფიქრობ, რომ კონგრესმენების განცხადება გამოწვეულია იმით, რომ არ აქვთ სრულყოფილი ინფორმაცია საქართველოს შესახებ, ან ის ინფორმაცია, რომელიც მათ მიეწოდებათ არ არის ზუსტი. ამიტომ მე დიდი სიამოვნებით მოვიწვევდი ამ კონგრესმენებს და იმ ადამიანებს, ვისაც აინტერესებს საქართველო, ვისთვისაც მნიშვნელოვანია საქართველოსა და აშშ-ის შორის ურთიერთობა. ჩამობრძანდნენ და ადგილზე გაეცნონ ვითარებას და აქვე გაეცნონ, როგორ ვითარდება დემოკრატია საქართველოში,"განაცხადა ფანჯიკიძემ.
კონგრესმენთა ორპარტიულმა ჯგუფმა აშშ-ის ახალ სახელმწიფო მდივანს, ჯონ კერის წერილი მისწერა და საქართველოში სრული დიპლომატიური რესურსების გამოყენება მოსთხოვა.
"ქართველი ხალხის უფლებების და თავისუფლებების და საქართველოს დემოკრატიული ინსტიტუტების დაცვის ინტერესებიდან გამომდინარე, გთხოვთ გადადგათ ნაბიჯები, რომლებიც კიდევ ერთხელ დაადასტურებს ამერიკის შეერთებული შტატების ინტერესს თავისუფალ და დემოკრატიულ საქართველოში. კრიზისის გადასაყვეტად, გთხოვთ გამოიყენოთ სახელმწიფო დეპარტამენტის ხელთ არსებული სრული დიპლომატიური რესურსი," მისწერეს საკანონმდებლო ორგანოს წარმომადგენლებმა კერის.
წერილს ხელს აწერენ აღმოსავლეთ ევროპის ურთიერთობებზე მომიშავე კანონმდებლები, მაიკლ ტერნერი (რესპუბლიკური პარტია, ოჰაიო, აშშ-ის ნატოს საპარლამენტო ასამბლეაში წარმომადგენლობით თავმჯდომარე), მარიო დიაზ-ბალარტი (რესპუბლიკური პარტია, ფლორიდა, ტრანატლანტიკური კანონმდებლების დიალოგის თავმჯდომარე), ბილ შუსტერი (რესპუბლიკური პარტია, პენსელვანია) და ელისონ შვარცი (დემოკრატიული პარტია, პენსილვანია, კონგრესის ჯგუფი საქართველოზე).