საქართველოს ფინანსთა მინისტრმა, ნოდარ ხადურმა, დღეს გამართულ ბრიფინგზე განაცხადა, რომ საქართველოში 2 მილიარდი დოლარის პირდაპირი უცხოური ინვესტიციის შემოსვლაა მოსალოდნელი.
"ეკონომიკის სამინისტროს აქვს პროგნოზი და ჩვენც ვეთანხმებით, რომ 2013 წელს ქვეყანაში 2 მილიარდი დოლარის პირდაპირი ინვესტიცია შემოვა. მთლიანი შიდა პროდუქტის ზრდა 2013 წელს 6 პროცენტი იქნება", - განაცხადა ნოდარ ხადურმა.
ფინანსთა მინისტრს არ დაუკონკრეტებია, რომელი ქვეყნებიდან და რა მოცულობის ინვესტიცია შეიძლება შემოვიდეს 2013 წელს ქვეყანაში.
ფინანსთა მინისტრი, სტატისტიკის ეროვნული ბიუროს ინფორმაციას გამოეხმაურა, იმის შესახებ, რომ საქართველოში ინვესტიციები შემცირდა.
''საქმე ეხება 2012 წლის მეოთხე კვარტლის მონაცემებს. სტატისტიკის ეროვნული სამსახურის ინფორმაციაში ორი პროცენტია დასახელებული: 47 პროცენტი და 3 პროცენტი. იქ ნათქვამია, რომ ინვესტიციები შემცირებულია 2012 წელს 2011 წლის წინასწარ მაჩვენებლებთან შედარებით. 2011 წლის მონაცემები დაზუსტდა 2012 წლის ზაფხულში. ასე რომ, დაზუსტების პერიოდში შეიძლება ეს მაჩვენებლები შეიცვალოს'', - აღნიშნა ნოდარ ხადურმა.
მისივე თქმით, უცხოური ინვესტიციების შემოდინების შემცირება საქართველოში 2012 წლის მეორე კვარტლიდან დაიწყო .
"ეს არ მომხდარა მხოლოდ მეოთხე კვარტალში. ამ შემთხვევაში გადამწყვეტი იყო საპარლამენტო არჩევნების მოლოდინი და ის პოლიტიკური წნეხი, რომელსაც ბიზნესი განიცდიდა წინა ხელისუფლების მხრიდან. სწორედ ეს იყო ინვესტიციის კლების ტენდენციის განმსაზღვრელი'', - განაცხადა მინისტრმა.
შეგახსენებთ, საქართველოს სტატისტიკის ეროვნული ბიუროს (საქსტატი) მიერ გამოქვეყნებული ინფორმაციით, 2012 წელს ინვესტიციები წინა წელთან შედარებით 23%-ით შემცირდა.
სტატისტიკური მაჩვენებლების მიხედვით, 2012 წელს ინვესტიციები მთელი წლის განმავლობაში იკლებდა და მეოთხე კვარტალში ყველაზე მცირე რაოდენობა - 181 მილიონი აშშ დოლარი შეადგინა. ეს მაჩვენებელი წინა კვარტალთან შედარებით 7.3%-ით, ხოლო წინა წლის ანალოგიურ პერიოდთან შედარებით - 47.2%-ით ნაკლებია.