საქართველოს სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში ალექსი პეტრიაშვილი ევროპის სახალხო პარტიის მიერ გავრცელებულ წერილს გამოეხმაურა და აღნიშნა, რომ ევროკავშირთან ასოცირების ხელშეკრულების რატიფიცირების ჩაშლის საფრთხეს ვერ ხედავს. პეტრიაშვილმა განაცხადა, რომ ახალი მთავრობის მიერ გადადგმული ნაბიჯები მიმართულია მხოლოდ გამჭვირვალობის გაზრდისკენ და რეალური დემოკრატიული ინსტიტუტების შექმნისკენ.
"ამ პროცესში ჩვენ მზად ვართ რეკომენდაციებისთვის, კრიტიკისა და შენიშვნებისთვის, ოღონდ ეს უნდა იყოს რეალურ ფაქტებზე დაფუძნებული. ჩვენთვის არავითარი სტანდარტების დაყენების პრობლემა არ არსებობს. პირიქით, მოვითხოვთ, რომ უმაღლესი სტანდარტებით მოხდეს საქართველოს შეფასება ევროპაში ინტეგრაციის გზაზე. ჩვენ გვაქვს ამ სტანდარტების დაკმაყოფილების ამბიცია და დარწმუნებული ვართ, რომ მიზანს მივაღწევთ. რაც შეეხება გასული 9 წლის მანძილზე დაშვებულ შეცდომებს, უმჯობესია, თუ ევროპაში ღიად და გულწრფელად იმსჯელებენ ამ თემებზე", - განაცხადა ალექსი პეტრიაშვილმა.
მისივე განმარტებით, ასოცირების ხელშეკრულების რატიფიცირების ჩაშლის საფრთხეს ვერ ხედავს, რადგან საქართველოს მთავრობა ყველა ნაბიჯს დგამს ამ მიმართულებით.
"ვაკეთებთ ყველაფერს, რაც ჩვენზეა დამოკიდებული. მოლაპარაკებები ძალიან ახლოს არის წარმატების დასრულებასთან. ვფიქრობ, ეს იქნება უმნიშვნელოვანესი ნაბიჯი საქართველოს ისტორიაში ევროპასთან კიდევ უფრო დაახლოების თვალსაზრისით", - აღნიშნა ალექსი პეტრიაშვილმა.
შეგახსენებთ, რომ ევროპის სახალხო პარტიამ დეკლარაცია გამოაქვეყნა, რომელშიც საქართველოს ხელისუფლებას, ქვეყნის ევროატლანტიკური ინტეგრაციის პროცესის განახლებისთვის სამოქმედო გეგმა შესთავაზა.
დეკლარაციაში ნათქვამია, რომ ევროპის სახალხო პარტია მხარს უჭერს საქართველოს ევროატლანტიკური ინტეგრაციის პროცესს და ხაზს უსვამს პროგრესს, რომელიც ბოლო წლების განმავლობაში გატარდა კანონის უზენაესობისა და დემოკრატიული სტანდარტების სფეროში. პარტია ამჟამინდელ ხელისუფლებას, დარჩენილი აუცილებელი რეფორმების განხორციელებისკენ მოუწოდებს.
ევროპის სახალხო პარტიის პრეზიდენტი ვილფრედ მარტენსი კი, საქართველოს ახალ მთავრობას წერილებში დაფიქსირებული მიზნების, სურვილებისა და პოზიციების საქმითა და ფაქტებით დადასტურებას სთხოვს. მისი თქმით, თუ საქართველოს მთავრობა სახალხო პარტიის დეკლარაციას არ გაითვალისწინებს, ევროკავშირთან ასოცირების ხელშეკრულება ვერ დასრულდება.