არასამთავრობო ორგანიზაციები, 3 მაისს გავრცელებულ ფარულ ვიდეოჩანაწერთან დაკავშირებით შეშფოთებას გამოთქვამენ და განცხადებას ავრცელებენ, რომელიც საერთაშორისო გამჭვირვალობა -საქართველოს ოფიციალურ ვებგვერდზე გამოქვეყნდა.
’’გვსურს გამოვხატოთ უკიდურესი შეშფოთება 3 მაისს გავრცელებულ ფარულ ვიდეოჩანაწერთან დაკავშირებით, რომელიც ადამიანების პირადი ცხოვრების ამსახველ დეტალებს შეიცავს. განსაკუთრებით შემაძრწუნებელია ის გარემოება, რომ ვიდეოში ფიგურირებს ჟურნალისტი, რაც თავისთავად წარმოშობს მედიაზე ზეწოლის მცდელობის ეჭვებს. ეჭვებს კიდევ უფრო აძლიერებს ის გარემოება, რომ, თავად ჟურნალისტის თქმით, ვიდეოს ინტერნეტში განთავსება უკავშირდება მის მიერ კორუფციული გარიგების გამოვლენის გეგმას ყოფილი და ამჟამინდელი მთავრობის წარმომადგენლების მონაწილეობით. მისივე მტკიცებით, კადრების გავრცელებაზე პასუხისმგებელნი სწორედ ეს პირები არიან’’ , - ნათქვამია განცხადებაში.
განცხადებაში აღნიშნულია, ახალი ხელისუფლების დაპირება, რომ მათ ხელთ არსებულ პირადი ცხოვრების ამსხაველ კადრებს გაანადგურებდნენ.
’’ჩნდება ეჭვი, რომ ახალმა ხელისუფლებამ არ გაატარა ეფექტური ქმედებები არც ძველი კადრების განადგურებისა და დაცვის და არც მანკიერი პრაქტიკის სრულად აღმოფხვრის მიმართულებით. აუცილებელია დადგინდეს, თუ როდის არის აღნიშნული ფარული ჩანაწერი გაკეთებული, ვის ჰქონდა წვდომა მასალებზე და როგორ მოხდა ამ კადრების განთავსება ინტერნეტში’’, - აცხადებენ არასამთავრობოები.
არასამთავრობო ორგანიზაციები, მომავალში მსგავსი შემთხვევების თავიდან აცილებისა და ჭეშმარიტების დადგენის მიზნით, ეფექტური გამოძიების ჩატარებას ითხოვენ. ორგანიზაციები მიესალმებიან შს მინისტრის, ირაკლი ღარიბაშვილის მიერ საქმის პირად კონტროლზე აყვანას, თუმცა თვლიან, რომ საქმის მიუკერძოებელი გამოძიებით მთელი მთავრობა უნდა იყოს დაინტერესებული. ’’განსაკუთრებით იმ პირობებში, როდესაც ჟურნალისტი ეჭვს გამოთქვამს საქმეში სამართალდამცავი ორგანოების მაღალი თანამდებობის პირების მონაწილეობასთან დაკავშირებით’’.
’’იქიდან გამომდინარე, რომ კადრები ელექტრონულ სივრცეში აიტვირთა, გამოძიებას არ უნდა გაუძნელდეს გავრცელების პირველადი წყაროს დადგენა. მიუხედავად იმისა, თუ დროის რა პერიოდშია შექმნილი აღნიშნული მასალა, ყველა პირი, რომელიც რაიმე ფორმით ხელს უწყობდა ვიდეოჩანაწერის შექმნას და შემდგომში მის გასაჯაროებას, კანონის სრული სიმკაცრით უნდა დაისაჯოს.
იმედი გვაქვს რომ, მომავალში აღარავინ გახდება მთავრობის მიერ უკანონოდ განხორციელებული ფარული ვიდეოჩანაწერებისა და მიყურადების საშუალებით წარმოებული შანტაჟის მსხვერპლი’’.
განცხადებას ხელს აწერს 5 არასამთავრობო ორგანზიაცია:
საერთაშორისო გამჭვირვალობა – საქართველო
საქართველოს დემოკრატიული ინიციატივა (GDI)
ადამიანის უფლებების სწავლებისა და მონიტორინგის ცენტრი (EMC)
საქართველოს ახალგაზრდა იურისტთა ასოციაცია
საქართველოს კონსტიტუციის 42-ე მუხლი
ფარული ვიდეოჩანაწერი