საინფორმაციო სააგენტო ინტერპრესნიუსის ცნობით, პრემიერმინისტრმა ბიძინა ივანიშვილმა აზებაიჯანელ ჟურნალისტებთან ენერგეტიკის მინისტრის კახა კალაძის მიერ ბუნებრივ აირთან დაკავშირებით გაკეთებულ განცხადებაზე ისაუბრა. ივანიშვილმა აზერბაიჯანის მთავრობას მადლობა გადაუხადა და აღნიშნა, რომ კალაძემ რუსეთიდან გაზის შესყიდვის თაობაზე ზოგადი განცხადება გააკეთა.
"მადლობას ვუხდი აზერბაიჯანის მთავრობას და პირადად ილჰამ ალიევს ამ ძალიან დაბალი ფასისათვის ბუნებრივ აირზე. მადლიერნი ვართ აზერბაიჯანის მთავრობის იმისათვის, რომ ასე იაფად ვყიდულობთ ჩვენ მათგან გაზს. კახი კალაძემ ინტერვიუს დროს, როდესაც დაუსვეს კითხვა, რომ ელექტროენერგიას ვყიდულობთ რუსეთისგან, ზოგადად თქვა, რომ რატომაც არა, სავაჭრო ურთიერთობები ჩვენ ყველასთან უნდა გავამყაროთ და გავაღრმავოთო. სამწუხაროდ, ჩვენ ასეთ ფასად არ შეგვიძლია ვიყიდოთ რუსეთისგან გაზი. ეს ნათქვამი იყო საერთო ფრაზებით. ჩვენ რუსეთთან უკეთესი უნდა გავხადოთ სავაჭრო ურთიერთობა და ეს ჰქონდა მას მხედველობაში და ჩვენმა პრეზიდენტმა ეს სხვა დონეზე ასწია, მან შეძლო "ფრთები შეესხა" ამ ფრაზებისათვის, ეს ზოგადად იქნა ყველაფერი ნათქვამი. ეს ნორმალურია, რუსეთთან სავაჭრო ურთიერთობები უნდა გავაღრმავოთ და გავაუმჯობესოთ, ეს ნორმალური მოვლენაა. სამწუხაროდ, გაზის ყიდვა უფრო იაფად შეუძლებელია. კიდევ ერთხელ ამისათვის დიდ მადლობას ვუხდით აზერბაიჯანის მთავრობას", - განაცხადა პრემიერმინისტრმა.
კახი კალაძის განცხადებას რუსეთიდან გაზის შესყიდვის თაობაზე 7 მაისს აზერბაიჯანში ვიზიტით მყოფი საქართველოს პრეზიდენტი გამოეხმაურა და პრემიერს ამ საკითხზე "ამომწურავი განმარტების" გაკეთებისკენ მოუწოდა.