2013 წლის სექტემბერში უძრავი ქონების ბაზარზე რეგისტრირებული ტრანზაქციების რაოდენობა მთელი ქვეყნის მასშტაბით, წინა წლის სექტემბერთან შედარებით, 31.3%-ით შემცირდა. ინფორმაციას ამის შესახებ საჯარო რეესტრის ეროვნული სააგენტო გასცემს.
საჯარო რეესტრის მონაცემებით, 2013 წლის სექტემბერში, აგვისტოსთან შედარებით, უძრავი ქონების ბაზარზე რეგისტრირებული ტრანზაქციების რაოდენობა 1.6%-ით გაიზარდა. ამავე პერიოდში მეორადი ბაზარი გაიზარდა 4.7%-ით, ხოლო პირველადი - 10.7%-ით შემცირდა. თუ პირველადი და მეორადი ბაზრების მონაცემებს წინა წლის სექტემბრის მაჩვენებლებს შევადარებთ, ვნახავთ, რომ ორივე ეს ბაზარი შემცირებულია: მეორადი - 18.9%-ით, ხოლო პირველადი - 60.2%-ით.
რაც შეეხება პირველად და მეორად სარეგისტრაციო ტრანზაქციებს შორის თანაფარდობას, წინა წლის სექტემბერთან შედარებით შემცირდა პირველადი სარეგისტრაციო ტრანზაქციების წილი: 2013 წლის სექტემბერში განხორციელებული სარეგისტრაციო ტრანზაქციების 82.5%-ს მეორადი, ხოლო 17.5%-ს - პირველადი სარეგისტრაციო ტრანზაქციები შეადგენდნენ მაშინ, როცა 2012 წლის სექტემბერში ეს მაჩვენებლები, შესაბამისად, 69.8% და 30.2% იყო.