ერთიანი ნაციონალური მოძრაობა ყოფილი პრემიერის ვანო მერაბიშვილის დღევანდელ განცხადებასთან დაკავშირებით, სისხლის სამართლის საქმის აღძვრას ითხოვს. პარტიის განცხადებით, აუცილებელია, გამოძიების დასრულებამდე, უფლებამოსილება შეუჩერდეს მთავარ პროკურორს ოთარ ფარცხალაძეს და სასჯელაღსრულების მინისტრს სოზარ სუბარს. ნაციონალური მოძრაობა ასევე ითხოვს ყველა ვიდეოდაკვირვების მასალის ამოღებას და ზურაბ ჟვანიას ფაქტთან დაკავშირებული ყველა ძველი და ახალი გარემოების გასაჯაროებას.
"ამ უკანონო აქტის მიღმა, ჩვენ ვხედავთ მთავრობის ცალსახა პოლიტიკას, რომელიც შეიძლება შეფასდეს, როგორც ოპოზიციის პოლიტიკური დევნის ახალი ტალღა, რომლის მიზანია პოლიტიკური ოპოზიციის განადგურება, როგორც ეს არაერთხელ აღნიშნა ქართული ოცნების ლიდერმა ბიძინა ივანიშვილმა", - ნათქვამია განცხადებაში.
შეგახსენებთ, რომ ყოფილმა პრემიერმინისტრმა ვანო მერაბიშვილმა ქუთაისში მიმდინარე სასამართლო სხდომაზე მთავარი პროკურორი ოთარ ფარცხალაძე ზეწოლაში დაადანაშაულა. მისი განცხადებით, პარასკევს, გვიან ღამით, 2-ის ნახევარზე, ის გაიყვანეს ციხიდან, ჩასვეს მანქანაში, თავზე გადააფარეს თავისივე მოსაცმელი და წაიყვანეს, მერაბიშვილის ვარაუდით, სასჯელაღსრულების დეპარტამენტში.
"იმ კაბინეტში დამხვდა ორი ადამიანი. ერთ-ერთი იყო პირადად მთავარი პროკურორი ფარცხალაძე. მან წამომიყენა ულტიმატუმი, რომ თუ არ დავეხმარები პროკურატურას ჟვანიას საქმის გამოძიებაში და თუ არ მივაწოდებ პროკურატურას მიხეილ სააკაშვილის საბანკო ანგარიშებს, მაშინ ძალიან ცუდ დღეში ჩავვარდები. მე მკაფიოდ გამოვხატე ჩემი აზრი, რომ კორუფციაში სააკაშვილის დადანაშაულება სასაცილოა. ასევე, ვუთხარი. რომ თავად გაეცნენ ზურაბ ჟვანიას საქმის მასალებს და ნუთუ ვერ დარწმუნდნენ, რომ წინა ხელისუფლების მიერ ჩატარებული გამოძიება უნაკლოა. მან მითხრა, რომ თუ ამ ორ მოთხოვნას შევასრულებდი, მაშინ მომცემდა ქვეყნიდან გასვლის შანსს, ასევე გამატანინებდნენ "მოპარულ" ფულს, წინააღმდეგ შემთხვევაში კი, ციხეში გამიუარესდებოდა პირობები და ჩემს პარტიულ თუ არაპარტიულ მეგობრებსაც დაიჭერდნენ", - განაცხადა მერაბიშვილმა და აღნიშნა, რომ გადაწყვეტილების მიღების დრო ორშაბათამდე მისცეს.
"მსგავსი რამ არ მახსენდება, რომ ოპოზიციის ლიდერს უშუალოდ მთავარი პროკურორი თავად აკაჩავებდეს", - თქვა ყოფილმა პრემიერმა და მისი ინფორმაციის გადამოწმების გზად ვიდეოჩანაწერების ამოღება დაასახელა.
