საქართველოს ხელბურთელთა ნაკრები 2015 წლის მსოფლიოს ჩემპიონატის საკვალიფიკაციო რაუნდში მონაწილეობს. პირველ ჯგუფში, ქართველი ხელბურთელების გარდა, ლიტვის, ფინეთისა და თურქეთის ეროვნული ნაკრებები გამოდიან.
პირველ შეხვედრაში საქართველო ლიტვასთან 17:23 დამარცხდა, შემდეგ ფინეთს 26:19 მოუგო, ანკარაში კი თურქეთთან 29:23 დამარცხდა.
5 იანვარს ჯორჯე რასიჩის გუნდმა, თბილისის სპორტის სასახლეში თურქეთის ნაკრებს უმასპინძლა და ანგარიშით - 33:26 დაამარცხა.
ქართველმა ხელბურთელებმა შეხვედრა თავდაჯერებულად დაიწყეს და პირველ ნახევარში მეტოქეს ოთხი ბურთით მეტი გაუტანეს - 19:15. შესვენების შემდეგ, თურქები გააქტიურდნენ, მაგრამ ქართველთა გუნდის მეკარე შოთა თევზაძე საიმედოდ გამოიყურებოდა. შედეგიანი შეხვედრა ჩაატარა კიდევ ერთმა ქართველმა ხელბურთელმა რატი მსხვილიძემ, მის ანგარიშზე 11 ბურთია.
საბოლოო ანგარიში ასეთია - 33:26 ქართველთა სასარგებლოდ. ამ გამარჯვების წყალობით, ჯორჯე რასიჩის გუნდი პლეიოფში გასვლის შანსს ინარჩუნებს. საქართველო 4 ქულით ამჟამად ჯგუფში მეორე ადგილზე იმყოფება და პირველადგილოსან ლიტვას 3 ქულით ჩამორჩება. მსოფლიოს ჩემპიონატის საკვალიფიკაციო ეტაპის დასრულებამდე ორი ტურია დარჩენილი - 8 იანვარს ქართველი ხელბურთელები ლიტვას უმასპინძლებენ, 11-ში კი სტუმრად, ფინეთს შეხვდებიან.
